فائنل میں سخت مقابلے کی توقع

یہ مقابلہ مختلف انداّز میں کھیلنے والے دنیا کےدو ممتاز کھلاڑیوں کے درمیان ایک دلچسپ مقابلہ ہو گا۔

فیڈیرر نے پچھلے سال سیمی فائنل میں روڈک کو بآسانی شکست دے دی تھی لیکن روڈک کے مطابق اس شکست کا اس میچ پر کوئی اثر نہیں ہو گا۔

روڈک نے کہا: ’ ہم دونوں مختلف حالات سے گزر کر اب بہتر کھلاڑی بن چکے ہیں‘

انہوں نے مزید کہا کہ اتوار کے میچ جیسا موقع بار بار نہیں ملتا۔

انیس سو بیاسی کے بعد یہ پہلا موقع ہے کہ عالمی رینکنگ میں پہلی دو پوزیشنوں پر فائز دو کھلاڑی ویمبلڈن فائنل میں ایک دوسرے کے مد مقابل ہیں۔

دونوں کھلاڑیوں نے فائنل تک پہنچنے میں صرف ایک ایک سیٹ ہارا ہے۔

موجودہ چمپئین فیڈیرر اس وقت بہت اچھی فارم میں ہیں اور فائنل کے متوقع فاتح قرار دیئے جا رہے ہیں۔

روڈک کے کوچ بریڈ گلبرٹ اس امر پر کافی فکر مند ہیں کہ روڈک کا سینٹر کورٹ پر یہ صرف دوسرا میچ ہو گا۔ روڈک نے اس ٹورنامنٹ میں اپنے پانچ میچوں سے کوئی بھی سینٹر کورٹ پر نہیں کھیلا۔

روڈک کے مطابق اس بارے میں فکر مند ہونے کا کوئی فائدہ نہیں اور وہ میچ میں اپنی کارکردگی پر توجہ دیں گے۔

دریں اثناء فیڈرر نے روڈک کی اس بات سے اتفاق کیا کہ وہ بھی پچھلے سال کی نسبت مختلف کھلاڑی ہیں جب انہوں نے روڈک کو شکست دی تھی۔

جیت کی صورت میں فیڈرر کی یہ چوبیسویں مسلسل فتح ہو گی اور وہ پیٹ سیمپریس کا تئیس میچوں میں مسلسل فتح کا ریکارڈ توڑ دیں گے۔