پہلی روسی خاتون جس نے یہ ٹائٹل جیتا ہے

انہوں نے فرینچ اوپن ٹینس کے مقابلے میں اپنی حریف روس ہی کی دوسری کھلاڑی ایلینا ڈیمنتیوا کو چھ۔ایک اور چھ۔دو سے ہرا کر یہ اعزاز حاصل کیا۔

ٹینس کی ان دو روسی خواتین کھلاڑیوں نے اپنی دوستی کو بالائے طاق رکھ کر سنیچر کے روز ٹینس کی تاریخ میں ایک نیا باب رقم کیا۔

مسکینا نے فائنل تک پہنچنے سے پہلے وینس ولیمز اور جینیفر کیپریاتی کو شکست دی جبکہ ڈیمنتیوا، ایمیلی موریسمو اور لینڈسے ڈیون پورٹ کو ہرا کر فائنل میں پہنچیں ہیں۔

روس کی ایلینا ڈیمنتیوا

ڈیمنتیوا کو گرینڈ مقابلوں میں شرکت کا زیادہ تجربہ تھا لیکن مسکینا نے بہترین کھیل کا مظاہرہ کر کے یہ مقابلہ جیت لیا۔

مسکینا اس وقت شہ سرخیوں میں آنے لگیں جب انہوں نے اس برس ہونے والے آسٹریلین اوپن ٹینس ٹورنامنٹ کے دوران اپنے کوچ سے یہ بحث کی کہ وہ ان کی مناسب حوصلہ افزائی نہیں کر رہے۔

برطانیہ کے ٹِم ہنمین

دوسری جانب برطانیہ کے ٹِم ہنمین کا کہنا ہے کہ وہ پیرس میں منعقدہ فرنچ اوپن ٹورنامنٹ کے سیمی فائنلز میں شکست کے باوجود دو ہزار چار کی کارگزاری پر خوش ہیں۔

جلرمو کوریا سے شکست کے بعد ٹِم ہنمین نے کہا کہ ’میں تیسرے راؤنڈز سے آگے کبھی نہیں پہنچا تھا اس لیے سیمی فائنلز تک آ جانا ہی فخر کی بات ہے۔‘

گزشتہ اکتالیس برس کے دوران ٹم ہینمین فرنچ اوپن کے سیمی فائنل تک پہنچنے والے پہلے برطانوی کھلاڑی ہیں۔