عبدالرشید شکور بی بی سی اردو ڈاٹ کام، ملتان

عمران نذیر نے پریکٹس میچ میں اچھی کارکردگی دکھائی تھی

انہیں بھارت کے خلاف پیر سے لاہور میں شروع ہونے والے دوسرے کرکٹ ٹیسٹ کے لئے پاکستان کرکٹ ٹیم میں شامل کرلیا گیا ہے۔

آف سپنر ثقلین مشتاق مایوس کن کارکردگی کے بعد ڈراپ کردیئے گئے ہیں۔ آف سپنر ثقلین مشتاق ملتان ٹیسٹ میں 204 رنز کے عوض صرف ایک وکٹ حاصل کرسکے۔ یہ واحد تبدیلی ہے جو سولہ رکنی پاکستانی سکواڈ میں عمل میں آئی ہے۔

عمران نذیر جارحانہ انداز میں بیٹنگ کرنے والے اوپنر ہیں جو اسوقت بھرپور فارم میں ہیں۔ انہوں نے بھارتی ٹیم کے خلاف لاہور میں کھیلے گئے وارم اپ میچ میں انتہائی جارحانہ بیٹنگ کرتے ہوئے صرف 32 گیندوں پر 9 چوکوں اور ایک چھکے کی مدد سے 65 رنز اسکور کئے تھے۔

22 سالہ عمران نذیر پاکستان کی طرف سے 8 ٹیسٹ میچ کھیل چکے ہیں جن میں انہوں نے 2 سنچریوں اور ایک نصف سنچری کی مدد سے 427 رنز بنائے ہیں جبکہ 57 ون ڈے انٹرنیشنل میچوں میں ان کے بنائے ہوئے رنز کی تعداد 1340 ہے جس میں ایک سنچری اور آٹھ نصف سنچریاں شامل ہیں۔

عمران نذیر نے آخری بار ٹیسٹ 2002 میں آسٹریلیا کے خلاف شارجہ میں کھیلا تھا جس کے بعد وہ پاکستان ٹیم سے ڈراپ کردیئے گئے تھے۔

لاہور ٹیسٹ کے لئے پاکستان کی سولہ رکنی ٹیم ان کھلاڑیوں پر مشتمل ہے: انضمام الحق ( کپتان )، توفیق عمر، عمران فرحت، عمران نذیر، یوسف یوحنا، یاسرحمید، عاصم کمال، معین خان، عبدالرزاق، شعیب ملک، شعیب اختر، عمرگل، محمد سمیع، شبیر احمد، دانش کنیریا اور مصباح الحق۔