بنگلہ دیش کی تسکین سے پابندی اٹھانے کی اپیل

بنگلہ دیش نے انٹرنیشنل کرکٹ کونسل سے اپیل کی ہے کہ غیر قانونی بولنگ ایکشن کے باعث پابندی لگنے والے فاسٹ بولر تسکین احمد پر سے پابندی اٹھا لی جائے۔

انٹرنیشل کرکٹ کونسل نے بنگلہ دیش کی کرکٹ ٹیم کے دو بولروں آف سپنر عرفات سنی اور فاسٹ بولر تسکین احمد کے بولنگ ایکشنز کو غیر قانونی قرار دیتے ہوئے اُنھیں فوری طور پر بین الاقوامی کرکٹ سے معطل کر دیا ہے۔

سنیچر کو آئی سی سی کی جانب سے جاری کیے گئے بیان میں کہا گیا ہے کہ دونوں بولروں کے ایکشنز کا جائزہ لیا گیا۔ عرفات کا بولنگ کروانے کے دوران بازوں کا خم 15 ڈگری سے زیادہ ہے۔ جو آئی سی سی کے قوانین کے خلاف ہے۔

چنّئی میں واقع آئی سی سی کے ٹیسٹنگ مرکز میں ان دونوں بولروں کے بائیومکینک تجزیے کیے گئے۔ بیان میں کہا گیا ہے کہ تسکین احمد کے بولنگ کو بھی قانونی قرار نہیں دیا جا سکتا ہے۔

اس پابندی کے بعد بنگلہ دیش کرکٹ ٹیم کو آئی سی سی ورلڈ ٹی 20 کے دوران ٹیم میں متبادل بولروں کو شامل کرنے کے لیے ٹیکنیکل کمیٹی کی اجازت لینا ہو گی۔

برطانوی خبر رساں ایجنسی روئٹرز کے مطابق بنگلہ دیش کرکٹ بورڈ کے صدر نظم الحسن نے میڈیا سے بات کرتے ہوئے کہا ’ہم تسکین پر لگی پابندی پر قائل نہیں ہیں۔ ہمارے پاس کوئی وجہ نہیں ہے کہ ہم تسکین کے بارے میں رپورٹ پر مطمئن ہوں۔‘

انھوں نے مزید کہا ’اور یہ مایوس کن بات ہے اور اسی لیے ہم نے آئی سی سی سے اپیل کی ہے۔ آئی سی سی قانونی ماہرین کے ہمراہ بیٹھے گی اور ہماری اپیل پر غور کرے گی اور جلد ہی اپنے فیصلے سے ہمیں آگاہ کرے گی۔‘

آئی سی سی کا کہنا تھا کہ بنگلہ دیش کے دونوں بولر بین الاقوامی کرکٹ نہیں کھیل سکتے لیکن بنگلہ دیش کرکٹ بورڈ کی رضا مندی سے ڈومیسٹک کرکٹ کھیل سکتے ہیں۔

انڈیا میں جاری ورلڈ ٹی 20 مقابلوں کے کوالیفائنگ راؤنڈ میں بنگلہ دیش اور ہالینڈ کے میچ کے بعد امپائروں نے ان دونوں کے ایکشن قواعد و ضوابط کے خلاف ہونے کے بارے میں رپورٹ دی۔

بنگلہ دیش نے یہ میچ آٹھ رنز سے جیت لیا تھا تاہم تسکین اور عرفات دونوں ہی اس میچ میں وکٹ لینے میں ناکام رہے تھے۔ یہ پہلا موقع نہیں کہ بنگلہ دیش کی کسی بولر کا ایکشن مشکوک قرار دیا گیا ہو۔

سنہ 2014 میں انٹرنیشنل کرکٹ کونسل نے مشکوک بولنگ ایکشن کی پاداش میں بنگلہ دیش کے آف سپنر سہاگ غازی پر پابندی عائد کی تھی۔