’افغان ٹیم بہت باصلاحیت ہے، صرف موقع ملنے کی ضرورت ہے‘

افغانستان کرکٹ ٹیم کے کوچ اور پاکستان کرکٹ ٹیم کے سابق کپتان انضمام الحق نے کہا ہے کہ افغان کرکٹ ٹیم پوری طرح تیار ہے اور ورلڈ کپ کے کوالیفائنگ راؤنڈ میں یقیناً کامیابی حاصل کرے گی۔

’لڑکے پوری طرح تیار ہیں، ہمیں ایشیا کپ کے لیے کوالیفائی کرنا چاہیے تھا اور ہم سب سے بہتر ٹیم تھے۔ بدقسمتی سے ہم نہیں کر سکے اور لڑکوں کو اس کا اندازہ ہے۔‘

یہ بات انضمام نے بی بی سی پشتو سروس کو کابل میں ایک انٹرویو کے دوران بتائی۔

انھوں نے کہا کہ ایشیا کپ کے کوالیفائنگ راؤنڈ کے بعد ہونے والے کیمپ میں لڑکوں نے بڑی محنت کی ہے۔ ’15، 20 دن جو ملے، انھوں نے اس میں پوری طرح کام کیا ہے اور جو بھی خامیاں ایشیا کپ میں نظر آئیں، ان کو دور کرنے کی کوشش کی ہے۔‘

انھوں نے کہا کہ بحیثیت کوچ وہ سمجھتے ہیں کہ افغانستان کی کرکٹ ٹیم کو اب بین الاقوامی سطح پر میچ کھیلنے کی ضرورت ہے۔ انھوں نے کہا کہ ان کی پوری کوشش ہو گی کہ ٹیم پورا ٹورنامنٹ کھیلے اور ’اگر ایک میچ ہار بھی جائیں تو اگلا میچ ملے تاکہ وہ اپنی صلاحیت دنیا کو دکھا سکیں۔‘

افغان ٹیم کے ہدف کے بارے میں پوچھے گئے ایک سوال کے جواب میں انضمام الحق کا کہنا تھا کہ کسی خاص ملک کو ہرانا ہرگز ان کا ہدف نہیں ہے۔ انھوں نے کہا کہ فی الوقت ان کی پوری توجہ اس بات پر مرکوز ہے کہ افغان ٹیم ورلڈ کپ کے دوسرے راؤنڈ میں جائے اور ان کی نظریں آٹھ، دس اور 12 مارچ کے میچوں پر مرکوز ہیں۔

انھوں نے مزید کہا: ’انشااللہ اللہ کی مدد سے ہم کوالیفائی کریں گے، اور یہی ہمارا پہلا ہدف ہے۔‘

انھوں نے کہا کہ اس کے بعد جنوبی افریقہ اور انگلینڈ کی ٹیموں سے مقابلہ متوقع ہے اور وہ ان ٹیموں کے خلاف اچھی کارکردگی دکھانے کی پوری کوشش کریں گے۔

ٹی 20 مقابلوں کے بارے میں بات کرتے ہوئے انھوں نے کہا کہ اس طرز کی کرکٹ میں کسی ٹیم کو کمزور قرار دینا درست نہیں ہے۔ انھوں نے کہا کہ سکاٹ لینڈ کی ٹیم بھی بہت اچھی ہے اور ہانگ کانگ کی ٹیم بھی کمزور تصور نہیں کی جا سکتی۔

انھوں نے مزید کہا کہ زمبابوے کی ٹیم جو آئی سی سی کی پوری رکنیت کی حامل بھی رہی ہے اور کافی تجربہ کار ٹیم ہے، اس کے جیتنے کے بھی امکانات ہیں، لیکن افغان ٹیم بھی بڑی مضبوط ہے۔

انھوں نے کہا کہ وہ کسی میچ کو آسان نہیں لے سکتے اور ہر میچ کو پوری محنت اور جاں فشانی سے کھیلنا ہو گا۔

افغان کھلاڑیوں کے بارے میں ایک سوال کے جواب میں انھوں نے کہا کہ انھیں موقع نہیں مل رہا۔ کھلاڑیوں پر مزید بات کرتے ہوئے انضمام نے شہزاد، نبی اور دولت کے نام لیے۔ انھوں نے کہا ایک نیا کھلاڑی راشد رحمان ٹیم میں شامل کیا گیا ہے جو بڑا اچھا ہے۔ اس کے علاوہ انھوں نے کہا کہ سپن بولر حمزہ اور گل بدین بین الاقوامی معیار کے کھلاڑی ہیں۔

انضمام کا کہنا تھا کہ افغان ٹیم کے میچوں کی جب ٹی وی کوریج ہو گی تو مختلف ملک میں کھیلی جانے والی لیگوں میں افغان کھلاڑیوں کی مانگ بڑھ جائے گی۔