فرانسیسی پراسیکیوٹرز اولمپکس بولیوں کی تحقیقات کریں گے

فرانس کے پراسیکیوٹرز نے سنہ 2016 اور 2020 کے اولمپکس مقابلوں کے انعقاد کے لیے دی جانے والی بولیوں میں بدعنوانی کے بارے میں اپنی تحقیقات وسیع کر دی ہیں۔

فرانسیسی حکام انٹرنیشل ایسوسی ایشن آف ایتھلیٹکس فیڈریشن (آئی اے اے ایف) کے سابق صدر لیمین ڈیاک سے پہلے ہی تحقیقات کر رہے ہیں۔

لیمین ڈیاک کو گذشتہ برس بدعنوانی اور منی لانڈرنگ کے الزامات کے تحت گرفتار کیا گیا تھا۔

فرانس کے پراسیکیوٹر کے دفتر کے ایک اہلکار نے بدعنوانی کی تحقیقات وسیع کرنے کی تصدیق کرتے ہوئے کہا ’ہم ان عناصر کو دیکھ رہے ہیں تاہم اس مرحلے پر تصدیق کا سوال ہے، ابھی کچھ بھی ثابت نہیں ہوا۔‘

انٹرنیشنل اولمپیک کمیٹی (آئی او سی) نے بی بی سی کو بتایا ہے کہ وہ فرانسیسی تحقیقات کا حصہ بننا چاہتی ہے

واضح رہے کہ ٹوکیو جو سنہ 2020 کے اولمپیکس کا میزبان ہے نے جنوری میں ہونے والی جانچ پڑتال میں ووٹنگ کے عمل کا دفاع کیا تھا۔

ریو اولمپکس کے منتظین نے منگل کو کہا ’ہم نے ان کھیلوں کی میزبانی کا حق جیتا کیونکہ ہمارے پاس بہترین پراجیکٹ تھا۔‘