اینڈی مرے کی شادی پر شہر میں جشن

برطانوی ٹینس سٹار اور ورلڈ نمبر تین اینڈی مرے سنیچر کو اپنی منگیتر کم سیئرز کے ساتھ اپنے آبائی شہر ڈنبلین میں شادی کر رہے ہیں۔

ان کی شادی مقامی وقت کے مطابق شام چار بجے ڈنبلین کے کیتھیڈرل میں ہوگی۔ اینڈی اور کم دونوں 27 سال کے ہیں۔

12ھویں صدی کے تاریخی چرچ میں شادی کی رسم کے بعد دونوں ایک ریسپشن میں شرکت کریں گے جہاں اہل خانہ اور چند قریبی دوستوں کو مدعو کیا گیا ہے۔

تاہم یہ خیال ظاہر کیا جا رہا ہے کہ سکاٹ لینڈ کے وسطی شہر میں ان کے بہت سے مداح اس موقعے پر موجود ہوں گے۔

شہر کی سجاوٹ بھی کی گئی ہے۔ سڑکوں کے دونوں کنارے پر جھنڈیاں لگائی گئی ہیں جبکہ کے مقامی دکاندار بھی اس میں پیش پیش ہیں۔

بعض لوگوں نے گارڈن پارٹی کا منصوبہ بنایا ہے۔

اطلاعات کے مطابق دوپہر 12 بجے سے شام چھ بجے تک چرچ کے اردگرد کی سڑکوں کو بند کر دیا جائے گا۔

اینڈی مرے 14 سال کی عمر میں پیشہ ور ٹینس کھلاڑی بننے کے لیے سپین چلے گئےتھے لیکن انھوں نے اپنے آبائی شہر سے قریبی رشتہ برقرار رکھا۔

انھوں نے سنہ 2013 میں ڈنبلین سے چند میل کے فاصلے پر سابق کنٹری ہاؤس کراملکس خرید کر اسے ایک پرتعیش ہوٹل میں تبدیل کروایا۔ ان کی شادی کا ریسپشن بھی وہیں ہو رہا ہے۔

مرے اپنی گرل فرینڈ کے ساتھ گذشتہ نومبر میں منگنی کی تھی اوردونوں میں دوستی کو نو برس سے زائد عرصہ بیت چکا ہے۔

سنہ 2005 میں دونوں کی ملاقات کم کے والد نائیجل کے ذریعے دونوں ہوئی تھی۔ نائیجل ٹینس کے کوچ ہیں۔

مرے نے کہا کہ ان کے ’تین بہترین مرد دوست ہیں۔ ایک ان کے بھائی اور ٹینس کھلاری جیمی اور دو ان کے دوست روس ہیچنز اور کارلوس میئر جبکہ کم سیئرز کو چار سہیلیاں رکھنی ہوں گی۔‘

انھوں نے کہا کہ وہ اس موقعے پر کسی قسم کی گھبراہٹ کا شکار نہیں ہیں۔

انھوں نے کہا: ’ہم لوگ ساڑھے نو سال سے ایک ساتھ ہیں اور گذشتہ چھ سات سال سے ایک ساتھ رہ رہے ہیں۔‘

انھوں نے کہا: ’میرے خیال میں اس سے زیادہ کچھ تبدیل نہیں ہوکا۔ میرے خیال سے ہم اتنے دنوں سے ساتھ ہیں کہ جیسے ہماری شادی ہو چکی ہو۔

’میرے خیال سے بچے کے بارے میں سوچنا زیادہ گھبراہٹ کا سبب ہوگا کیونکہ اس سے زندگی میں بڑی تبدیلی آئے گی۔‘