شمالی کوریا: جیت پر جشن، ہار کی خبر ہی غائب

شمالی کوریا کے میڈیا نے اپنے بڑے حریف جنوبی کوریا سے فٹبال میں شکست کو سرے سے رپورٹ ہی نہیں کیا۔

پیونگ یانگ کے راڈنگ سنمن اخبار نے ایشئن گیمز میں میڈل جیتنے پر جشن جیسے سماں کو تو رپورٹ کیا لیکن اخبار انہی مقابلوں میں مردوں کے فٹبال کے فائنل مقابلے میں جنوبی کوریا سے شکست کی خبر کھا گیا۔

سول سے جاری ہونے والے روزنامے چوزن ایلبو کے مطابق ، اس کے برعکس خواتین کی فٹبال ٹیم کی فائنل میں جاپان کے خلاف تین، ایک سے فتح کو ایسے پیش کیا گیا جیسے مردوں کی فٹبال ٹیم وجود ہی نہیں رکھتی۔

شمالی کوریا کے مرکزی ٹیلی ویژن نے 36 میڈلز جیتنے کے بعد کھلاڑیوں کی جشن نما پریڈ دکھائی جس میں معروف سیاسی رہنما تو موجود تھے لیکن کھیلوں سے دلچسپی رکھنے والے ملک کے رہنما کم یانگ ان، منظر سے غائب تھے۔

گولڈ میڈلز جیتنے والوں کا تو پریڈ میں جوش و خروش سے استقبال کیا گیا لیکن مردوں کی بے چاری فٹبال ٹیم کو گھاس ہی نہیں ڈالی گئی۔

شمالی اور جنوبی کوریا ایک دوسرے کے سخت حریف تصور ہوتے ہیں اور دونوں ممالک میں سالہا سال سے جاری کشیدگی کھیل کے میدان میں بھی دیکھی جاتی ہے۔