کرسچیانو رونالڈو سال کے بہترین فٹبالر
ہسپانوی فٹبال کلب ریئل میڈرڈ کے پرتگالی کھلاڑی کرسچیانو رونالڈو نے فیفا کا بیلن ڈی اور ایوارڈ جیت لیا ہے۔
اس ایوارڈ کا اعلان پیر کی شام سوئٹزرلینڈ کے شہر زیورخ میں منعقدہ تقریب میں کیا گیا۔
پرتگال کی ٹیم کے 28 سالہ کپتان کے ہمراہ اس ایوارڈ کی دوڑ میں بارسلونا کے لیوئنل میسی اور بائرن میونخ کے فرینک ریبری بھی شامل تھے۔
ارجنٹائن کے 26 سالہ فارورڈ میسی گذشتہ چار سال سے یہ انعام جیت رہے تھے لیکن اس بار رونالڈو کو اس ایوارڈ کے لیے پسندیدہ قرار دیا جا رہا تھا۔
رونالڈو کا انتخاب فیفا کے ارکان کی فٹبال ٹیموں کے کپتانوں، کوچ اور صحافیوں نے کیا۔
کرسچیانو رونالڈو نے آخری مرتبہ سنہ 2008 میں مانچیسٹر یونائیٹڈ کی جانب سے کھیلتے ہوئے یہ اعزاز جیتا تھا۔ انہوں نے گزشتہ سال اپنے کلب اور ملک کی طرف سے 56 میچوں میں 66 گول کیے۔
اس تقریب میں برازیل کے معروف فٹبالر پیلے کو بھی اعزازی بیلن ڈی اور ایوارڈ دیاگیا۔
اس کے علاووہ فیفا پرو ورلڈ XI ٹیم سمیت سات ایوارڈز کا اعلان کیا گیا اور جرمن گول کیپر ندین اینگرر نے بہترین خاتون کھلاڑی کا اعزاز جیتا۔
جرمنی کے ہی کلب بائرن میونخ کے سابق کوچ جُپ ہینکس کو سال کا بہترین کوچ قرار دیا گیا۔ اس ایوارڈ کے لیے ان کا مقابلہ مانچیسٹر یونائٹڈ کے سابقہ کوچ سر ایلکس فرگسن اور ڈارمنڈ کے جرگن کلوپ سے تھا۔
اس کے علاوہ سویڈن کے ابراہمووچ کے گول کو سال کا بہترین گول قرار دیا گیا جبکہ فیئر پلے ایوارڈ افغانستان کو دیا گیا۔
فرانس نے سنہ 1956 میں یورپی فٹبالرز کو نوازنے کے لیے بیلن ڈی اور متعارف کروایا تھا لیکن سنہ 2007 میں اسے عالمی حیثیت دے دی گئی تھی۔
میسی نے گزشتہ سال اپنے ملک اور کلب کی جانب سے کھیلتے ہوئے 45 میچوں میں 42 گول کیے تھے۔
