بھارت کی انڈر-19 کرکٹ ٹیم کے کپتان انمکت چند نے فائنل میں سنچری بنائی۔
بھارت کی انڈر-19 کرکٹ ٹیم نے انیس سال سے کم عمر کے کھلاڑیوں کا عالمی کرکٹ کپ جیت لیا ہے۔
آسٹریلیا کے شہر ٹاؤنس ولے میں کھیلے جانے والے فائنل میں بھارتی ٹیم نے آسٹریلیا کو چھ وکٹوں سے شکست دی۔
واضح رہے کہ بھارت نے تیسری بار یہ ورلڈ کپ جیتا ہے۔ اس سے قبل سنہ دو ہزار اور دو ہزار آٹھ میں بھی بھارت اس ٹورنامنٹ میں فتحیاب رہا تھا۔
ٹونی آئی لینڈ اسٹیڈیم میں اتوار کو کھیلے جانے والے فائنل میچ میں بھارت نے ٹاس جیتا اور آسٹریلیا کو پہلے بلے بازی کی دعوت دی۔
آسٹریلیا نے پہلے بلے بازی کرتے ہوئے آٹھ وکٹ کے نقصان پر دو سو پچیس رنز بنائے اور بھارت کے سامنے جیت کے لیے دو سو چھبیس رنز کا ہدف رکھا جسے بھارتی بلے بازوں نے چار وکٹ کے نقصان پر سینتالیس اعشاریہ چار گیندوں میں ہی حاصل کر لیا۔
بھارت کی جانب سے کپتان انمکت چند نے بغیر آؤٹ ہوئے ایک سو گیارہ رنز کی اننگز کھیلی اور بھارت کو جیت سے ہمکنارکیا۔ انھیں ان کی بلے بازی کی وجہ سے مین آف دی میچ قرار دیا گیا۔
بھارت تیسری بار انڈر-19 کرکٹ عالمی کپ کا فاتح ہوا ہے۔
بھارت کے وکٹ کیپر ایس کے پٹیل نے بھی عمدہ بلے بازی کی اور بغیر آؤٹ ہوئے باسٹھ رنز بنائے اور بھارت کی جیت میں اہم کردار ادا کیا۔
کپتان انمکت چند نے جیت کے بعد کہا کہ ’مجھے یقین نہیں آرہا ہے، میں خدا کا شکر ادا کرتا ہوں کہ میں اپنی ٹیم کو یہاں تک لے کر آ سکا۔ آسٹریلوی کھلاڑیوں نے عمدہ کرکٹ کھیلی لیکن ہم کامیاب رہے۔‘
آسٹریلیا کے کپتان کو ورلڈ کپ کے دوران عمدہ کارکردگی کے لیے مین آف دی سیریز قرار دیا گیا۔ انھوں نے کہا کہ ’ہم لوگ کافی مایوس ہیں۔ہم نے کچھ اہم کیچ چھوڑ کر بڑی غلطی کی۔ بھارت نے عمدہ کھیل پیش کیا۔‘
انھوں نے مزید کہا کہ انمکت چند نے پہلے بھی آسٹریلیا کو پریشان کیا تھا اور یہ پہلا موقعہ نہیں ہے جب انھوں نے عمدہ بلے بازی کی ہے۔
آسٹریلیا کی جانب سے کپتان ڈبلو جی بسسٹو نے سب سے زیادہ ستاسی رنز بنائے جبکہ بھارت کی جانب سے سندیپ شرما نے چار وکٹیں لیں اور آسٹریلیا کو بڑا اسکور کرنے سے باز رکھا۔
