کرکٹ: انڈین کپتان وراٹ کوہلی ٹیسٹ میچ کو پانچ کے بجائے چار روز تک محدود کرنے کی تجویز کے مخالف کیوں؟
،تصویر کا ذریعہGetty Images
انڈین کرکٹ ٹیم کے کپتان وراٹ کوہلی کا کہنا ہے کہ وہ ٹیسٹ میچ کو پانچ دن سے کم کر کے چار دن کرنے کی تجویز کے ’مداح نہیں‘ ہیں۔
ٹیسٹ میچ کو پانچ روز کے بجائے چار روز کرنے کی تجویز رواں ماہ اس وقت زیر غور آنے کی امید ہے جب بین الاقوامی کرکٹ کونسل سنہ 2023 سے آگے کے ٹیسٹ کیلنڈر پر تبادلہ خیال کرے گا۔
مگر 31 سالہ کوہلی، جو ٹیسٹ رینکنگ میں ٹاپ بلے باز بھی ہیں، کا کہنا ہے کہ ’اس کے پس پردہ نیت شاید درست نہ ہو۔ کیونکہ اس کے بعد آپ تین روزہ ٹیسٹ کی بات کریں گے۔‘
’اس کا خاتمہ کہاں ہو گا؟ اس کے بعد اب ٹیسٹ کرکٹ کے غائب ہونے کی بات کریں گے۔‘
یہ بھی پڑھیے
End of سب سے زیادہ پڑھی جانے والی
انگلینڈ اینڈ ویلز کرکٹ بورڈ نے کہا ہے کہ وہ اس تجویز کی ’محتاط انداز میں حمایت‘ اس لیے کرتا ہے کیونکہ اس سے کھلاڑیوں پر کھیل کا بوجھ کم ہو گا۔
آئی سی سی کی ٹیسٹ رینکنگ میں انڈیا نمبر ون ٹیم ہے جس نے گذشتہ چھ ٹیسٹ سیریز میں سے پانچ سیریز جیتی ہیں جبکہ ایک ڈرا ہوئی ہے۔
جب کوہلی سے چار روزہ ٹیسٹ کی بابت ان کی رائے معلوم کی گئی تو ان کا کہنا تھا کہ ’میرا نہیں خیال کہ ایسا کرنا کھیل کے اس خالص ترین فارمیٹ کے ساتھ کوئی منصفانہ عمل ہو گا۔‘
انھوں نے مزید کہا کہ ’ابتدائی طور پر کرکٹ کا آغاز کیسے ہوا، پانچ روزہ ٹیسٹ میچ بین الاقوامی سطح پر آپ کا سب سے بڑا امتحان ہو سکتا ہے۔‘
’اسے تبدیل نہیں کیا جانا چاہیے۔‘
دسمبر 2017 میں ساؤتھ افریقہ نے زمبابوے کے خلاف چار روزہ ٹیسٹ میچ کھیلا تھا جبکہ جولائی 2019 میں انگلینڈ نے لارڈز کے میدان پر آئرلینڈ کے خلاف چار روزہ ٹیسٹ کھیلا تھا۔
