ڈبلن: آئرلینڈ اپنا پہلا بین الاقوامی ٹیسٹ میچ ہار گیا، پاکستان کی پانچ وکٹوں سے کامیابی
،تصویر کا ذریعہGetty Images
ڈبلن میں پاکستان اور آئرلینڈ کے درمیان کھیلے گئے واحد ٹیسٹ میچ میں پاکستان نے میزبان ٹیم کو پانچ وکٹوں سے شکست د ے دی ہے۔
یہ آئرلینڈ کا پہلا بین الاقوامی کرکٹ ٹیسٹ میچ تھا۔
منگل کو ٹیسٹ میچ کے پانچویں اور آخری روز آئرلینڈ نے پاکستان کو جیتنے کے لیے 160 رنز کا ہدف دیا تھا جو اس نے پانچ وکٹوں کے نقصان پر پورا کر لیا۔
پاکستان کی جانب سے امام الحق 74رنز کے ساتھ نمایاں رہے اور آؤٹ نہیں ہوئے۔
160 رنز کے ہدف کے تعاقب میں پاکستان کا آغاز اچھا نہ تھا اور صرف 14 کے مجموعی سکور پر اس کی تین وکٹیں گر چکی تھیں۔
اظہر علی دو، حارث سہیل سات اور اسد شفیق ان رن بنا کر آؤٹ ہوئے۔
تاہم اس کے بعد اپنا پہلا ٹیسٹ میچ کھیلنے والے امام الحق اور بابر اعظم نے ذمہ دارانہ کھیل کا مظاہرہ کرتے ہوئے اپنی ٹیم کو فتح سے ہمکنار کروانے میں کلیدی کردار ادا کیا۔
End of سب سے زیادہ پڑھی جانے والی
بابر اعظم 59 رنز بنا کر رن آؤٹ ہوئے تو پاکستانی ٹیم فتح سے صرف 20 رنز کی دوری پر تھی۔
اس کے بعد آنے والے بلے باز سرفراز احمد صرف آٹھ رنز بنا کر آؤٹ ہوئے۔
آئرلینڈ کی جانب سے مرتاغ نے دو جبکہ ٹامسن اور رینکن نے ایک، ایک وکٹ حاصل کی۔
،تصویر کا ذریعہGetty Images
اس سے قبل ٹیسٹ میچ کے پانچویں روز آئرلینڈ کی ٹیم 339 رنز بنا کر آؤٹ ہوگئی تھی۔ آئرلینڈ کی اننگز کی خاص بات کیون اوبرائن کی عمدہ سنچری تھی جنھوں نے 118 رنز کی اننگز کھیلی۔ اس کے علاوہ ٹامسن 53 اور جوئس 43 رنز کے ساتھ نمایاں رہے۔
اسی بارے میں مزید خبریں
دوسری اننگز میں پاکستان کی جانب سے محمد عباس نے پانچ، محمد عامر نے تین اور شاداب خان نے ایک وکٹ حاصل کی۔
خیال رہے کہ پاکستان کی ٹیم نے پہلی اننگز میں آئرلینڈ کو 130 رنز پر آؤٹ کرنے کے بعد فالو آن پر مجبور کر کے دوبارہ بیٹنگ کی دعوت دی تھی لیکن ناقص فیلڈنگ اور چند متنازع فیصلوں کے بعد آئرلینڈ کی ٹیم 160 رنز کا ہدف دینے میں کامیاب رہی تھی۔
آئرلینڈ کے خلاف ٹیسٹ میچ کے بعد اب پاکستان 24 مئی سے انگلینڈ کے خلاف دو ٹیسٹ میچوں کی سیریز کھیلے گا اور تین ٹی 20 میچ سکاٹ لینڈ میں کھیلے گا۔
