اٹلانٹس بارہ روز خلا میں گزار کر زمین پر واپس آئی

اٹلانٹس برطانیہ کے وقت کے مطابق 10 بجکر اکیس منٹ پر فلوریڈا میں واقع کینیڈی سپیس سینٹر کے رن وے 33 پر اتری۔

اٹلانٹس کے کمانڈر برینٹ جیٹ نے لینڈنگ کے بعد کہا ’واپس آنا اچھا لگ رہا ہے۔ یہ ایک زبردست مجموعی کارکردگی (ٹیم ایفورٹ) تھی‘۔

سن دو ہزار تین میں کولمبیا شٹل کے حادثے کے بعد خلا میں بھیجا جانے والا یہ تیسرا مشن تھا۔

شٹل نے بدھ کو اترنا تھا لیکن خلانوردوں نے شٹل کے باہر خلا میں کئی ٹکڑوں کو اڑتے ہوئے دیکھا تو حفاظتی نقطہ نظر اس کی لینڈنگ میں تاخیر کر دی گئی۔

تاہم بعد میں جانچ سے معلوم ہوا کہ ان ٹکڑوں سے شٹل کو کسی قسم کے نقصان کا خطرہ نہیں ہے۔

زمین پر پہنچنے کے لیئے مدار بدلنے کے بعد ایک گھنٹے کی پرواز کے دوران شٹل کے باہر درجہ حرارت 3000 فارن ہائٹ تک پہنچ گیا تھا۔

اس مشن کا مقصد خلا میں موجود بین الاقوامی خلاف سٹیشن (آئی ایس ایس) کی دوبارہ تعمیر شروع کرنا تھا۔

آئی ایس ایس پر اپنے قیام کے دوران خلانوردوں نے خلائی سٹیشن کے ساتھ نئے شمسی توانائی حاصل کرنے والے پر لگائے جن سے اب وہاں توانائی پیدا کرنے کی صلاحیت دو گنا ہو گئی ہے۔