بی بی سی کے پینوراما پروگرام جس کو پیر کو دیکھایا جائے گا، سائنسی تحقیق کے حوالے سے بتایا جائے گا کہ چھ اور سات مہینے کے اندر (چھبیس ہفتے) میں پیدا ہونے بچوں کو ذہنی معذوری کا خطرہ رہتاہے ۔

بی بی سی پینوراما کو سائنسی تحقیق، ایپی کیور سٹدی تک خصوصی رسائی حاصل ہوئی ہے جس کے مطابق وقت سے پہلے پیدا ہونے والے 1200 بچوں پر ہونے والی تحقیق سے ثابت ہوا ہے کہ ایسے بچوں کی ذہنی صحت بہت ہی خراب ہوتی ہے اور ان میں سیکھنے کی صلاحیت بہت ہی کم ہوتی ہے۔

ڈاکٹروں میں اس بات پر بحث ہو رہی ہے کہ ایسے بچوں کو بچانے کی کوشش کی جانی چاہیے یا نہیں۔ اس معاملہ پر ابھی کوئی اتفاق نہیں ہو سکا ہے۔

ایک نارمل حمل چالیس ہفتے تک رہتا ہے۔ تحقیق سے پتہ چلا ہے کہ برطانیہ میں 1995 میں وقت سے پہلے 4004 بچے پیدا ہوئے تھے ان میں سے صرف 1200 زندہ پیدا ہوئے اور ان میں 811 کو خصوصی نگہداشت کے شعبے میں داخل کرنا پڑا۔ ان 811 میں سے صرف 314 زندہ رہے اور گھر جانے کی اجازت ملی۔

ان 314 بچوں میں میں پچاس فیصد بچوں کو کسی نہ کسی معذوری کا سامنا تھا۔ ان معذوریوں میں بہرہ پن اور اندھا پن بھی شامل ہیں۔