میِٹ اپ ڈاٹ کام پر بش مخالف سیاسی مہم زوروں پر ہے۔

امریکہ میں اس مرتبہ کی صدارتی انتخابی کی مہم میں ایک بات واضح ہے اور وہ ہے امیدواروں کی طرف سے انٹرنیٹ کا مختلف اور جدید طریقوں سے استعمال۔ شائد یہی وجہ ہے کہ صدر بش کی انتخابی مہم کے انچارج رالف ریڈ بھی اب اس نئے طریقے کو بروئے کار لانے کی کوشش کررہے ہیں۔

اگرچہ اب دائیں بازو کے سیاسی حلقوں کا رجحان بھی اس طرف بڑھ رہا ہے لیکن اب تک اس ٹیکنالوجی کا سب سے زیادہ استعمال بائیں بازو کے لوگوں نے ہی کیا ہے۔ اس بات کا سب سے بڑا ثبوت ڈیموکریٹک پارٹی کی طرف سے صدارتی امیدواری کے خواہشمند ہاورڈ ڈینز کی طرف سے چلائے جانے والی مہم تھی جس کے ذریعے انہوں نے اپنی مہم کے لئے بڑے پیمانے پر فنڈز بھی اکھٹے کئے اور وہ خاصے مقبول بھی ہوئے۔

اور اب بش مخالف گروپ اسی ٹیکنالوجی کے ذریعے اس سال کے الیکشن میں جان کیری کو کامیاب بنانے کی کوشش کرہے ہیں۔ نیویارک اور امریکہ کے دوسرے شہروں میں میِٹ اپ ڈاٹ کام کے ذریعے ہر ہفتے جان کیری کے ساتھ لوگوں کی آن لائن ملاقات کرواتے ہیں جس میں لوگ دنیا کی کسی بھی حصے سے شرکت کر سکتے ہیں۔ لیکن بائیں بازو کے یہ زیادہ ترگروپ جو اس طرح کی ملاقاتیں کرواتے ہیں یہ کہتے ہیں کہ وہ جان کیری کی حمایت اس لئے کررہے ہیں کیونکہ وہ بش کے مخالف ہیں نہ کہ کیری کے حامی۔