ایک نئی تحقیق کے مطابق خوبصورتی میں نکھار لانے کا یہی جنون برطانوی لوگوں کو بینکوں سے قرض لینے پر مجبور کرتا ہے۔ عورتوں میں زیادہ تر پلاسٹک سرجری یا تو سینے کو نمایاں کرنے کے لیے یا پھر ناک کو خوبصورت بنانے کے لیے کی جاتی ہے۔

پلاسٹک سرجری کے دیوانے مرد حضرات بھی ہیں جو اپنے ہونٹوں کو خوبصورت بنانے کے لئے بینکوں سے قرض لیکر پلاسٹک سرجن سے رابطہ قائم کرتے ہیں۔

ایبی بینک کے ایک سروے کے مطابق اپنی خوبصورتی میں نکھار لانے والے ان افراد نے فی کس چار ہزار برطانوی پاؤنڈ قرضہ لے رکھا ہے۔

صحت کی ایک نجی تنظیم بوپا نے برطانیہ میں اپنے چونتیس اسپتالوں میں

کئے جانے والے ایک جائزے میں دیکھا گیا کہ پلاسٹک سرجری کے خواہشمند افراد میں بیس فیصد کا اضافہ ہوا ہے۔

قابل ذکر بات یہ ہے کہ ماضی کے برعکس اب برطانوی مرد بھی اپنی خوبصورتی کے بارے میں زیادہ سنجیدہ پائے جاتے ہیں۔

سٹی آف لندن کلینک کے مطابق گزشتہ ماہ سے پلاسٹک سرجری کے لئے ریکارڈ نمبر میں مردوں کی جانب سے درخواستیں موصول ہوئیں۔ ان میں سے ستر فیصد سے بھی زائد مرد درخواست کنندگان اپنی ناک کی تراش خراش اور ہونٹ نا زک کرانا چاہتے تھے۔

تاہم بوپا نے کہا کہ سینے کو نمایاں کرانے کے لیے سرجری اب بھی خواتین میں سب سے مقبول ہے۔

ڈاکٹر اینابیل بنٹلی کا کہنا تھا کہ مرد اور خواتین میں پلاسٹک سرجری کی بڑھتی مقبولیت کی وجہ یہ ہے کہ برطانیہ میں لوگ اب اپنی خوبصورتی کے بارے میں زیادہ حساس ہو گئے ہیں اور ذرا سے بھی بدصورتی ان کی انا کو ٹھیس پہنچانے کی وجہ بنتی ہے۔