امریکی انسٹی ٹیوٹ آف ہیلتھ کے محققین نے پتہ چلایا ہے کہ اس مرض میں مبتلا ایک تہائی افراد کے پھیپھڑوں میں خون کا دباؤ زیادہ تھا۔

نیو انگلینڈ جرنل آف میڈیسن میں شائع ہونے والے ایک مضمون میں کہا گیا ہے کہ ایسے افراد کا اگر بغور معائنہ کر لیا جائے تو انہیں پھیپھڑوں کے فشارِ خون یا بلڈ پریشر میں مبتلا ہونے سے محفوظ رکھا جا سکتا ہے۔

کیونکہ اگر بروقت پتہ چل جائے تو ایسے مریضوں کو خون کا دباؤ کم کرنے والی ادویات بروقت تجویز کی جا سکتی ہیں۔

سِکل سیل بھُس ایک موروثی مرض ہے جو جزائرِغرب الہند اور ایشیائی افراد میں پایا جاتا ہے۔ اس نقص کے سبب خون کے سرخ ذرات کی، جو آکسیجن بردار ہوتے ہیں، شکل بگڑ جاتی ہے۔

یہ خلیے آپس میں جڑ کر خون کی باریک نالیوں میں خون کی گردش میں رکاوٹ پیدا کر دیتے ہیں۔ اور اس طرح متعلقہ عضو تک آکسیجن کی فراہمی رک جاتی ہے جس کے نتیجہ میں یہ عضو متاثر ہوجاتا ہے۔

محققین نے اس معائنہ کے لئے ڈوپلر ایکوکارڈیوگرافی کا طریقہ استعمال کیا جس میں خون کے بہاؤ کی رفتار جانچنے کے لئے آواز کی لہروں سے مدد لی جاتی ہے۔

ڈاکٹر گریفن راجرز کا جنہوں نے اس تحقیق میں حصہ لیا کہنا ہے کہ یہ ٹیسٹ زیادہ مہنگا نہیں ہے۔