ایٹمی بجلی گھر کی تعمیر پر تنازعہ  | | نیوکلئیر فیوژن کا عمل | |
نیوکلئیر فیوژن کے تحت چلنے والے دنیا کے سب سے پہلے ایٹمی بجلی گھر کی تعمیر کی جگہ کے انتخاب کا فیصلہ ایک سال کے لئے موخر کردیا گیا ہے۔ تھرمو نیوکلئیر ایکسپیریمنٹل پروجیکٹ یا آئی ٹی ای آر نے واشنگٹن میں یہ فیصلہ کرنا تھا کہ آیا یہ پلانٹ فرانس میں تعمیر کیا جائے یا جاپان میں۔ واشنگٹن میں مذاکرات میں شامل ہونے والے مختلف ممالک کے رہنماؤں کی آراء میں شدید اختلاف پایا جاتا تھا جس کے باعث بجلی گھر کی تعمیر کے مقام کے انتخاب کا فیصلہ موخر کرنا پڑا۔ امریکہ فرانس میں بجلی گھر کی تعمیر کے خلاف تھا کیونکہ فرانس نے عراق کے خلاف جنگ میں امریکہ کی حمایت نہیں کی تھی۔ جاپان میں بجلی گھر کی تعمیر کے تین فائدے شمار کئے گئے۔ ایک تو یہ مقام ایک بندرگاہ کے قریب ہے، زمین سخت چٹان پر مشتمل ہے جو کہ بجلی گھر کی ضرورت ہے اور تیسری یہ کہ یہ امریکی فوجی اڈے کے نزدیک ہے۔ یورپی یونین، روس اور چین فرانس کے حق میں تھے جبکہ امریکہ اور جنوبی کوریا جاپان کے حق میں۔ اس بجلی گھر کی تعمیر کے لئے کھربوں ڈالر درکار ہوں گے اور اس کی تعمیر کم از کم دس سال میں مکمل ہوسکے گی۔ ماہرین کا کہنا ہے کہ جس ملک میں اسے تعیر کیا جائے گا وہ اس بجلی گھر سے بہت فائدہ اٹھاسکے گا۔ نیوکلئیر فیوژن کے اصول کے بارے میں کہا جاتا ہے کہ اس کے ذریعے ماحول کو نقصان پہنچائے بغیر لا محدود توانائی حاصل کی جاسکتی ہے۔ آئی ٹی ای آر کے ایک اعلٰی اہلکار یاسو اوشی مو مورا کہتے ہیں کہ اس کے ذریعے پائیدار انداز میں توانائی حاصل کی جاسکتی ہے۔ اب تک دوسرے ری ایکٹرز کے ذریعے کئے گئے تجربات سے ثابت ہوا ہے کہ نیوکلئیر فیوژن ری ایکشن صرف چند سیکنڈز کے لئے جاری رکھا جا سکتا ہے مگر اب یہ سائنسدانوں کے لئے ایک بہت بڑی پیش رفت ہے کہ وہ پائیدار انداز میں فیوژن کے اصول کے تحت لا محدود بجلی پیدا کرسکیں گے۔ | 
یہ صفحہ دوست کو ای میل کیجیئے
پرِنٹ کریں
