یہ صفحہ دوست کو ای میل کیجیئے		پرِنٹ کریں

قدیم ترین چاول کا دانہ

کوریا میں ماہرینِ آثارِ قدیمہ نے دنیا کے قدیم ترین چاول کے دانے دریافت کئے ہیں۔ ماہرینِ آثارِ قدیمہ کے مطابق یہ مٹھی بھر جلے ہوئے چاول پندرہ ہزار سال پرانے ہیں۔

ماہرین کا یہ دعوٰی ابھی متنازعہ ہے کیونکہ اس سے قبل یہ سمجھا جاتا رہا ہے کہ چین میں چاول کی کاشت بارہ ہزار سال قبل شروع ہوئی تھی۔

دریافت کئے گئے چاول کے یہ دانے جینیاتی طور پر چاول کی موجودہ اقسام سے مختلف ہیں جس سے سائنسدانوں کو چاول کے ارتقاء کے بارے میں جاننے میں مدد ملے گی۔

آج چاول انسانوں کی خوراک کا بڑا حصہ ہے اور خاص طور پر ایشیا میں دیگر خوراک کی بہ نسبت چاول زیادہ پسند کئے جاتے ہیں۔

یہ دریافت جنوبی کوریا سے تعلق رکھنے والے ماہرینِ آثارِ قدیمہ لی یونگ جو اور وو جونگ یو نے ایک گاؤں کی کھدائی کے دوران کی۔

جس علاقے سے یہ چاول دریافت ہوئے ہیں وہ علاقہ ایشیا میں پتھر کے زمانے کے بارے میں معلومات کا ایک اہم ذریعہ رہا ہے۔