یہ صفحہ دوست کو ای میل کیجیئے		پرِنٹ کریں

مجسمہ دو لاکھ برس قدیم بتایا جارہا ہے

ایک ماہرِ آثارِ قدیمہ نے دعوٰی کیا ہے کہ اس نے پتھر پر تراشیدہ انسانی چہرے دریافت کئے ہیں جو دو لاکھ برس قدیم ہیں۔

یہ انسانی مجسمے پیاترو گائیتو نامی شخص نے سن دو ہزار ایک میں اٹلی کے ایک علاقے بورزوناسکا کی مہم کے دوران دریافت کئے۔

ان کا کہنا ہے کہ پتھر کے اس ٹکڑے پر دو انسانی چہرے تراشنے کی کوشش کی گئی ہے جو مختلف سمتوں میں دیکھ رہے ہیں اور ان کی گردن مشترک ہے۔ ان میں سے ایک کی داڑھی بھی دکھائی گئی ہے اور گائیتو کے مطابق یہ چہرہ تاثرات سے پر ہے۔

مقامی باشندوں کا کہنا ہے کہ یہ دریافت علاقے میں کوئی نئی بات نہیں ہے۔ ان کا کہنا ہے کہ علاقے میں ایک پوری چٹان قدیم زمانے میں تراشی گئی تھی جسے وہ ’بورزون‘ کا چہرہ کہتے ہیں۔

گائیتو نے یہ چہرے اس وقت دریافت کئے جب ایک عمارت کی تعمیر کے لئے ملبہ جمع کیا جا رہا تھا۔ یہ چٹان کا ٹکڑا اسی ملبے میں شامل تھا۔ ان کا خیال ہے کے دو لاکھ برس قدیم مجسمے کسی مذہبی رسومات میں استعمال کئے جاتے تھے۔

گائیتو کا یہ بھی دعوٰی ہے کہ یہ مجسمہ ارتقائے انسانی کے اس دور سے تعلق رکھتا ہے جب نسان نے سیدھے کھڑے ہونا سیکھ لیا تھا اور ’ہومو اریکٹس‘ کہلانے والی یہ نسل اس علاقے میں آباد تھی۔

تاہم دیگر ماہرین کا کہنا ہے کہ ان کا یہ دعوٰی متنازعہ ہے کیونکہ ہومو اریکٹس نسل کے انسان اتنی صلاحیت نہیں رکھتے تھے کہ وہ فنونِ لطیفہ کے فن پارے تشکیل دیتے۔