آئی فون 5 ایس کا سکینر ہیک کرنے کا دعویٰ
ہیکروں کے ایک جرمن گروپ نے اتوار کو آئی فون 5 ایس کی لانچنگ کے صرف دو دن بعد ہی اس کے فنگر پرنٹ سکینر کو ہیک کرنے کا دعویٰ کیا ہے۔
اس فون کی نئی ٹیکنالوجی کے بارے میں ایپل نے دعویٰ کیا تھا یہ فون کو جرائم پیشہ اور معلومات چوری کرنے والے افراد سے بچا کے رکھے گا۔
اگر اس ہیکنگ کی تصدیق ہوگئی تو یہ ایپل کے لیے بڑی خفت کی بات ہوگی کیونکہ ان کا کہنا ہے کہ آئی فون کا سکینر اسے سام سنگ اور دوسرے اینڈروئیڈ فونز سے ممتاز کرتا ہے۔
<link type="page"><caption> آئی فون 5 ایس کی ٹچ آئی ڈی کتنی محفوظ</caption><url href="http://www.bbc.co.uk/urdu/science/2013/09/130921_apple_fingerprint_tech_rwa.shtml" platform="highweb"/></link>؟
آئی فون کے دو اہم سکیورٹی ماہرین نے خبر رساں ادارے روئٹرز کو بتایا کہ انھیں یقین ہے کہ کیاس کمپیوٹنگ کلب یا سی سی سی نامی گروپ ایپل کی ٹچ آئی ڈی کو ہیک کرنے میں کامیاب ہوا ہے، تاہم ان ماہرین نے خود آئی فون کی ہیکنگ نہیں کی۔
ان میں سے ایک ماہر چارلی میلر نے، جو آئی او ایس ہیکرز ہینڈ بک کے شریک مصنف بھی ہیں، کہا کہ ہیکرز نے ’فون کی ٹچ آئی ڈی کی سکیورٹی مکمل طور پر پاش پاش کر دی۔اس کی وجہ سے یقیناً حملہ آوروں کو مزید مواقع ملیں گے۔‘
جب اس معاملے پر ایپل کا موقف جاننے کی کوشش کی گئی تو انھوں نے کوئی جواب نہیں دیا۔
سی سی سی کا شمار دنیا کے بڑے ہیکروں کے گروپوں میں ہوتا ہے۔ اس گروپ نے اپنی ویب سائٹ پر ایک ویڈیو پوسٹ کی جس میں ایک شخص کو آئی فون 5 ایس تک جعلی آئی ڈی کے ساتھ رسائی کرتے دکھایا گیا ہے۔
End of سب سے زیادہ پڑھی جانے والی
گروپ کی سائٹ پر یہ بھی بیان کیا گیا ہے کہ اس کی بائیو میٹرکس کی ٹیم نے کس طرح آئی فون کے انگلیوں کے نشان کے سنسر کو ہیک کیا۔انگلیوں کے نشان کا سنسر نئے فون میں بہت خاص فیچر ہے۔
گروپ نے کہا کہ انھوں نے ٹچ آئی ڈی کو اس لیے نشانہ بنایا تاکہ ان اطلاعات کو غلط ثابت کیا جا سکے کہ نئے فون کی آئی ڈی کو ہیک کرنا مشکل ہوگا۔
سی سی سی کے ایک ہیکر سٹاربگ نے اپنی ویب سائٹ پر کہا کہ ’کسی بھی چیز کو محفوظ بنانے کے لیے نشانِ انگشت استعمال نہیں کیے جانے چاہییں، کیونکہ آپ ہر جگہ انگوٹھے کے نشان چھوڑتے ہیں جس سے آسانی سے جعلی نشانِ انگشت بنائے جا سکتے ہیں۔‘
یاد رہے کہ ایپل نے اپنے نئے فونز میں انگلیوں کے نشان کا سنسر نصب کیا ہے اور یہ وہ ٹیکنالوجی ہے جو ممکنہ طور پر پاس ورڈ کے زمانے کو خیرباد کہنے میں اہم قدم ثابت ہو سکتی ہے۔
آئی فون 5 میں ٹچ آئی ڈی کی سہولت کے باعث صارف اپنی انگلی کے نشانات کی مدد سے فون کا لاک ختم کرسکتا ہے اور اس کو مشکل پاس ورڈ یاد کرنے کی ضرورت نہیں پڑتی۔
