مریخ روور: ناسا کا پرسیورینس مریخ پر پتھر کا دوسرا نمونہ ڈرل کرنے میں کامیاب
،تصویر کا ذریعہNASA/JPL-CALTECH
- مصنف, جانتھن ایموس
- عہدہ, بی بی سی سائنس کارسپانڈنٹ
امریکی خلائی ادارے کی سیارے مریخ پر موجود گاڑی پرسویرنس کے بارے میں امید ظاہر کی جا رہی ہے کہ اپنی دوسری کوشش میں وہ بالآخر مریخ کی سطح پر ڈرلنگ کے بعد ایک چٹان کا نمونہ اٹھانے میں کامیاب ہو گئی ہے۔ اس پتھر کو اب واپس زمین پر لایا جائے گا۔
مریخ سے آنے والی تصاویر میں دیکھا جا سکتا ہے کہ بظاہر چٹان میں صفائی سے سوراخ کیا گیا اور اس کا ٹکڑا زمین پر بھیجے جانے کے لیے خلائی گاڑی میں محفوظ ہے۔
گذشتہ ماہ اس طرح کی ایک کوشش اس وقت ناکام ہو گئی تھی جب ڈرلنگ سے حاصل کیا گیا چٹان کا ٹکڑا پاؤڈر بن جانے کی وجہ سے محفوظ نہیں کیا جا سکا تھا۔
مریخ کی چٹان کا نمونہ حاصل کرنے کی اپنی دوسری کوشش میں کامیابی کی صورت میں پہلی بار ہو گا کہ کسی دوسرے سیارے سے چٹان کا ٹکڑا زمین پر واپس لانے کے لیے حاصل کیا گیا ہو گا۔
مریخ پر خلائی گاڑی پرسیویرنس کے مقاصد میں اگلے ایک سال میں دو درجن سے زیادہ ایسے نمونے حاصل کرنے ہیں جو پھر اس دہائی کے آخر میں امریکہ اور یورپ کی مشترکہ کوشش سے زمین پر واپس پہنچائے جائیں گے۔
پرسیورینس اس سال فروری میں مریخ کے جیزیرو نامی گڑھے پر اتری تھی جس کی چوڑائی 45 کلومیٹر ہے۔ اس گڑھے کے بارے میں خیال ہے کہ اربوں سال پہلے یہاں ایک جھیل تھی۔ اس تاریخ کی وجہ سے ماہرین کا خیال ہے کہ اگر مریخ میں زندگی کبھی انتہائی بنیادی صورت میں موجود تھی تو پھر جیزیرو میں اس کے آثار ضرور ہوں گے۔
پرسویرنس مریخ پر اترنے کے بعد اب تک تقریباً دو کلومیٹر فاصلہ طے کر چکی ہے۔ یہ وہ مقام تھا جہاں پرسیورینس نے اپنی تازہ ترین ڈرلنگ کرنے کی کوشش کی تھی۔
،تصویر کا ذریعہNASA/JPL-CALTECH
اس روبوٹ میں ایسا نظام موجود ہے جس کے ذریعے یہ روبوٹ اس پتھر کا انگلی کے برابر حجم کا ٹکڑا کاٹ کر اسے سیلنڈر نما ٹیوب میں بند کر دے گا۔
End of سب سے زیادہ پڑھی جانے والی
اس سیلنڈر کو بند کرنے سے پہلے روور اس کی تصاویر بھی بنائے گا۔ اگست کے آغاز میں ایسی ہی ڈرلنگ کا ایک تجربہ اس موقع پر آ کر ناکام ہوا تھا، جب سائنسدانوں کو یہ معلوم ہوا تھا کہ ٹیوب میں تو کچھ ہے ہی نہیں اور اس روبوٹ نے پتھر کو پاؤڈر بنا دیا ہے اور یہ ڈرلنگ کے مقام کے ساتھ ہی کہیں گر گیا ہے۔
یہ بھی پڑھیے
تاہم ٹیم کی حوصلہ افزائی اس وقت ہوئی جب پرسیورینس کی جانب سے تصاویر موصول ہوئیں جن میں جمعرات کو صاف دیکھا جا سکتا ہے کہ پتھر کا کچھ حصہ ٹیوب کے سرے پر موجود ہے۔
روور کی جانب سے اس نمونے کو مکمل طور پر پرکھا جائے گا۔ پرسیورینس کی نگرانی اس کا چھوٹا ہیلی کاپٹر انجینویٹی کرتا ہے۔
،تصویر کا ذریعہNASA
اس ڈرون کو مارس پر ٹیکنالوجی میں جدت ظاہر کرنے کے لیے مریخ پر لے جایا گیا تھا لیکن اب اس کے ذریعے روور کے آگے موجود راستہ دیکھا جاتا ہے۔
اب تک انجینویٹی نے 12 پروازیں کر لی ہیں۔
