چلتی بس میں جنسی زیادتی کی کوشش

چلتی بس میں سوار ایک 14 سالہ بچی کو جنسی زیادتی کا نشانہ بنانے کی کوشش کے بعد اس کو بس سے دھکا دے کر ہلاک کر دیا گیا ہے۔

یہ اندہوناک واقع بھارت کی ریاست پنجاب میں پیش آیا۔

تفصیلات کے مطابق ہلاک ہونے والی بچی اپنی ماں اور چھوٹے بھائی کے ہمراہ موگا ضلع سے ایک بس پرسوار ہوئی۔

بس میں سواریاں کم ہونے سے فائدہ اٹھاتے ہوئے بس کے عملے نے ان کے ساتھ جنسی زیادتی کی کوشش کی۔ اس کے بعد بس کے عملے نے مبینہ طور پر ماں اور بیٹی کو چلتی بس سے دھکا دے دیا۔ چلتی بس سے گرنے کی وجہ سے لڑکی ہلاک ہو گئی اور اس کی ماں شدید زخمی ہو گئیں۔

اس واردات میں ملوث ہونے کے شبہے میں بس کے کنڈکٹر اور کلینر کے علاوہ ایک اور شخص کو حراست میں لے لیا گیا ہے۔

دہلی میں سنہ 2012 میں بھی بس میں سوار ایک طالبہ کا گینگ ریپ کرنے کے بعد بری طرح زخمی کر دیا گیا تھا۔ 23 برس کی بچی مجرموں سے ہاتھ پائی میں شدید زخمی ہو گئی تھیں جن زخموں سے وہ جان بر نہیں ہو سکیں تھیں۔

اس واقعے نے پورے بھارت کو جنجھوڑ کر رکھ دیا تھا اور ملک بھر میں عورتوں کے حق میں مظاہرے ہوئے تھے۔

تازہ ترین واقعے میں زخمی ہونے والی خاتون نے ایک بھارتی ٹی وی چینل کو انٹرویو دیتے ہوئے کہا کہ ان سے چلتی بس میں بدسلوکی کی گئی اور پہلے انھوں نے پہلی بچی کو اور پھر مجھے بس سے نیچے دھکیل دیا۔

پولیس نے ملزمان کی گرفتاری کا دعوی کیا ہے اور کہا ہے کہ کیس کی تفتیش بہت جلد مکمل کر لی جائے گی۔