چین میں نئے سال کا آغاز، کروڑوں افراد عازم سفر

چین میں قمری سال کے آغاز پر جشن منانے کے لیے کروڑوں افراد اپنے اپنے گھروں کا رخ کر رہے ہیں۔

اس موقع پر چین میں کیے جانے والے سالانہ سفر کو دنیا کی ’سب بڑی سالانہ ہجرت‘ کہا جاتا ہے۔

چین کی سرکاری نیوز ایجنسی ژنہوا کے مطابق 40 دن کے دوران ملک میں تقریباً تین ارب بار سفر کیا جائے گا۔

اس موقعے پر جشن منانے کے لیے چین میں سرکاری چھٹیوں میں اضافہ ہوتا ہے اور اسے ’گولڈن ویک‘ کہا جاتا ہے جو 24 فروری کو ختم ہو رہا ہے۔

لیکن بہت سے لوگ اس سے قبل اور اس کے بعد بھی سفر کرتے ہیں۔

اسے سپرنگ فیسٹیول یا جشن بہار کے نام سے بھی پکارا جاتا ہے اور اس کا آغاز ایک بڑی دعوت سے ہوتا ہے جسے ’ملاپ عشایہ‘ کہا جاتا ہے۔ اور یہ ڈنر نئے سال کی ابتدا پر بدھ کو منعقد کیا جا رہا ہے۔

اس موقعے پر لوگ اپنے رشتے داروں کے گھر ملاقات کے لیے جاتے ہیں۔ جہاں جہاں چینی نسل کے لوگ بڑی تعداد میں ہیں جیسے تائیوان، سنگاپور، ملائیشیا وغیرہ وہاں بھی اس تقریب کا اہتمام کیا جاتا ہے۔

ویت نام میں قمری نئے سال کو ’ٹیٹ‘ کے نام سے پکارا جاتا ہے جبکہ جنوبی کوریا میں اسے ’سیولال‘ کہا جاتا ہے

۔