’دہشتگردوں کواسلام کا نمائندہ نہ بننے دیں‘

ایران کے رہبر اعلیٰ آیت اللہ خامنہ ای نے مغرب کے نوجوانوں سے کہا ہے اسلام کے متعلق جھوٹی خبروں کی بھرمار ہے اور انھیں چاہیے کہ اسلام کو براہِ راست جاننے کی کوشش کریں۔

مغربی ممالک کے نوجوانوں کے نام کھلے خط میں آیت اللہ خامنہ ای کا کہنا ہے کہ وہ متعصب رویوں پر کان دھرنے کی بجائے قرآن پڑھیں اور پھر ’غیر جانبدارانہ فیصلہ‘ کریں۔

انھوں نے کہا کہ وہ فرانس میں حالیہ واقعات کی وجہ سے یہ خط لکھنے پر مجبور ہوئے ہیں۔

اس ماہ کے آغاز میں پیرس میں ہونے والے دو حملوں میں اسلامی جنگجوؤں نے سترہ افراد کو ہلاک کر دیا تھا۔

اپنی ویب سائٹ پر شائع ہونے والے ایک بیان میں یران کے رہبر اعلیٰ نے کہا کہ وہ یورپ اور شمالی امریکہ کے نوجوانوں کے لیے یہ پیغام اس لیے لکھ رہے ہیں کہ وہ اپنے ممالک کا مستقبل ہیں۔

انھوں نے کہا کہ وہ اسلام کی ’مناسب، درست اور غیر متعصب‘ سمجھ بوجھ حاصل کریں اور اس مذہب کے متعلق اپنا نظریہ بنائیں۔

انھوں نے کہا کہ وہ یہ سوال کریں کہ کیوں خوف پھیلانے اور نفرت کی پرانی پالیسی نے اسلام کو اتنی شدت سے نشانہ بنایا ہے۔

انھوں نے کہا کہ ’گذشتہ دو دہائیوں سے زیادہ کے عرصے سے، تقریباً جب سے سویت یونین ٹوٹا ہے، کوشش کی جا رہی ہے کہ اس عظیم مذہب کو خوفناک دشمن کے طور پر پیش کیا جائے۔‘

’انھیں اجازت نہ دیں کہ وہ اپنے بھرتی کیے ہوئے دہشت گردوں کو اسلام کے نمائندے بنا کر پیش کریں۔‘

7 جنوری کو پیرس میں ہونے والے جان لیوا حملوں کے بعد یورپ ہائی الرٹ پر ہے۔

ایران نے چارلی ہیبڈو کے دفتر پر حملے کی مذمت کی لیکن اس کے ساتھ ساتھ گزشتہ ہفتے میگزین کی جانب سے پیغمبرِ اسلام کا خاکہ چھاپنے کی بھی مذمت کی ہے۔