جیتندر مان گوگی: انڈیا کے گینگسٹر کا دلی کی ایک عدالت میں قتل، پولیس کی جوابی فائرنگ میں حملہ آور بھی ہلاک
،تصویر کا ذریعہANI
انڈیا کے دارالحکومت دلی کی ایک عدالت میں دو افراد نے انڈیا کے انتہائی مطلوب گینگسٹر جیتندر مان گوگی کو قتل کر دیا ہے۔
دلی کے علاقے روہنی کی ایک عدالت میں دو افراد وکلا کے حلیے میں کمرہ عدالت میں داخل ہوئے اور انھوں نے انڈیا کے گینگسٹر جیتندر مان گوگی کو فائرنگ کر کے قتل کر دیا، اس عدالت میں ان کے خلاف کیس کی سماعت ہو رہی تھی۔
حکام کا کہنا ہے کہ پولیس نے جوابی فائرنگ کر کے دونوں حملہ آوروں کو ہلاک کر دیا۔ پولیس کو یہ شک ہے کہ ایک جرائم پیشہ حریف گروہ نے اس حملے کی منصوبہ بندی کی تھی۔
جیتندر مان گوگی دلی پولیس کی انتہائی مطلوب افراد کی فہرست میں شامل تھے اور وہ دیگر ریاستوں میں قتل، اغوا اور دھوکہ دہی سمیت درجنوں مقدمات میں مطلوب تھے۔
اس واقعے نے دلی کی عدالتوں کے سکیورٹی نظام پر متعدد سوالات کو جنم دیا ہے۔ ایک سینیئر سیاستدان کا کہنا ہے کہ اس واقعے نے سکیورٹی پلاننگ میں سنگین ناکامی کی نشاندہی کی ہے۔
واضح رہے کہ جیتندر مان گوگی کو قتل اور بھتہ خوری کے الزام میں گذشتہ سال مارچ میں دلی سے گرفتار کیا گیا تھا۔
،تصویر کا ذریعہGetty Images
یہ بھی پڑھیے
End of سب سے زیادہ پڑھی جانے والی
،تصویر کا ذریعہEPA
حکام نے بتایا کہ جیتندر مان گوگی جرائم کی دنیا میں تیزی سے اوپر آنے کی وجہ سے کئی گروہوں کے ہدف پر تھے۔ اطلاعات کے مطابق جرائم میں جیتندر مان گوگی کا کریئر اس وقت شروع ہوا جب وہ کمسن تھے اور ابتدائی طور پر وہ کار چوری سمیت دیگر ایسے ہی جرائم میں ملوث تھے۔ لیکن بعد میں ان کا نام کئی اہم شخصیات کے قتل میں پولیس کی تفتیش میں شامل رہا۔
وہ دیگر افراد کے قتل کے ساتھ ساتھ ریاست ہریانہ کے ایک معروف گلوکار کے قتل میں بھی مطلوب تھے۔
