آپ اس وقت اس ویب سائٹ کا ٹیکسٹ پر مبنی ورژن دیکھ رہے ہیں جو کم ڈیٹا استعمال کرتا ہے۔ مرکزی ویب سائٹ جہاں تمام تصاویر اور ویڈیوز موجود ہیں دیکھیے
تصاویر: انڈیا میں دنیا کے سب سے طویل القامت مجسمے کی تعمیر
انڈیا میں دنیا کا سب سے طویل القامت مجسمہ تعمیر کے آخری مراحل میں ہے۔
ریاست گجرات میں انڈیا کی جدوجہد آزادی کے ہیرو سردار ولبھ بھائی پٹیل کو خراج عقیدت پیش کرنے کے لیے ان کا تقریباً 182 میٹر (600 فٹ) اونچا مجسمہ تعمیر کیا جا رہا ہے۔
اس وقت دنیا کا سب سے بڑا مجسمہ چین میں سپرنگ ٹمپل بدھا کا ہے جس کی اونچائی 138 میٹر ہے۔
اس منصوبے پر تقریباً 29.9 ارب انڈین روپے لاگت آئی ہے اور اس کو وزیراعظم نریندر مودی کی ذاتی دلچسپی پر مشتمل منصوبے کے طور پر دیکھا جا رہا ہے۔ اسے 'اتحاد کا مجسمہ' کہا جا رہا ہے اور اس کی انڈین وزیراعظم 31 اکتوبر کو نقاب کشائی کریں گے۔
انڈیا کی سنہ 1947 میں آزادی کے بعد ولبھ بھائی پٹیل ملک کے پہلے ڈپٹی وزیراعظم بنے تھے۔
آزادی کے بعد شورش زدہ ریاستوں کو متحد اور انڈیا میں ضم کرنے کی وجہ سے انھیں 'آئرن مین آف انڈیا' کے نام سے یاد کیا جاتا ہے۔
بہت سے ہندو قوم پرستوں کا خیال ہے کہ تاریخ میں ان کے مقام کو نہرو خاندان کے مقابلے میں زیادہ اہمیت نہیں دی گئی۔ خیال رہے کہ نہرو خاندان انڈین سیاست کا اہم حصہ ہے۔
یہ بھی پڑھیں!
End of سب سے زیادہ پڑھی جانے والی
سنہ 2013 میں اپنی انتخابی مہم کے دوران نریندر مودی کا کہنا تھا کہ 'ہر انڈین کو افسوس ہے کہ سردار پٹیل پہلے وزیراعظم نہیں بنے۔'
اس مجسمے کی تعمیر سنہ 2013 میں شروع ہوئی تھی اور مکمل ہونے کے بعد کانسی سے مزین یہ مجسمہ نیویارک کے سٹیچیو آف لبرٹی سے لمبائی میں دگنا ہوگا۔
یہ امید کی جا رہی ہے کہ یہ جگہ اہم سیاحتی مقام بن جائے گی۔
اس مجسمے کو بلندی سے دیکھنے کے لیے اس کے قریب ایک گیلری بھی تعمیر کی جارہی ہے جس کی اونچائی 153 میٹر ہوگی۔
یہ مجسمہ ریاستی دارالحکومت احمد آباد سے 200 کلومیٹر فاصلے پر واقع ہے۔
اس مجسمے کی تعمیر کے لیے 2500 سے زائد افراد کام کر رہے ہیں جن میں کئی سو چینی مزدور بھی شامل ہیں۔
۔
