دو شریفوں میں گڑبڑ ہوئی تو سویلین شریف کے ساتھ: اچکزئی
پختون خوا ملی عوامی پارٹی کے سربراہ محمود خان اچکزئی کا کہنا ہے کہ وزیر اعظم میاں نواز شریف اور آرمی چیف جنرل راحیل شریف اس وقت ایک پیج پر ہوں گے جب آئین بالادست ہوگا۔
انھوں نے یہ بات بدھ کے روز قومی اسمبلی کے اجلاس سے خطاب کرتے ہوئے کہی۔
اُنھوں نے کہا کہ ’اگر دونوں کے درمیان کچھ گڑ بڑ ہوئی تو میں سویلین شریف کے ساتھ ہوں گے‘۔
،تصویر کا ذریعہBBC World Service
منگل کو آرمی چیف جنرل راحیل شریف کی زیر صدارت کور کمانڈرز کے اجلاس کے بعد آئی ایس پی آر کی طرف سے جاری ہونے والے بیان میں کہا گیا ہے کہ ملک میں دہشت گردی کے خاتمہ کے لیے جاری آپریشن کے نتائج حاصل کرنے اور ملک میں قیام امن کے لیے ضروری ہے کہ حکومت انتظامی امور کو بہتر کرے۔
اجلاس میں نکتہ اعتراض پر بات کرتے ہوئے محمود حان اچکزئی کا کہنا تھا کہ کورکمانڈر کانفرنس کے بعد فوج کے شعبہ تعلقات عامہ کی طرف سے جو بیان جاری کیا گیا ہے وہ آئین کی روح کے منافی ہے۔ اُنھوں نے کہا کہ اس بیان کے بارے میں سپریم کورٹ سے تشریح کروائی جائے۔
End of سب سے زیادہ پڑھی جانے والی
اُنھوں نے کہا کہ بعض لوگ اس معاملے پر جان بوجھ کر بیان نہیں دینا چاہیے یا پھر’ہم نے بےایمانی سے حلف اُٹھایا ہے‘۔
محمود خان اچکزئی کا کہنا تھا کہ خطے میں جنگی ماحول ہے۔ ’عراق اور لیبیا ختم ہوگیا ہے جبکہ ادھر داعش کی باتیں ہو رہی ہیں۔‘
اُنھوں نے کہا کہ اُن کی جماعت کسی بھی ایسی خارجہ پارلیسی کی حمایت نہیں کرے گی جو یہاں یعنی پارلیمنٹ میں نہ بنائی گئی ہو۔
اُنھوں نے کہا کہ ان حالات میں پارلیمنٹ کا مشرکہ اجلاس بلا کر اعتماد میں لیا جائے۔
پاکستان تحریک انصاف کے رکن قومی اسمبلی شفقت محمود نے نے کہا کہ فوج کے شعبہ تعلقات عامہ کی طرف سے جاری کیا گیا یہ بیان حکومت کی نااہلی کی طرف اشارہ ہے۔ اُنھوں نے کہا کہ حکومت شدت پسندی کے خلاف نیشنل ایکشن پلان پر ہونے والی پیش رفت کے بارے میں ایوان کو آگاہ کرے اور اسے اعتماد میں لے۔
پاکستان تحریک انصاف کے رکن قومی اسمبلی ڈاکٹر عارف علوی کا کہنا تھا کہ فوجی اور سویلین عدالتوں کو ایک دوسرے کے ساتھ تعاون کرنا چاہیے ورنہ شدت پسندی کے خلاف جنگ میں اس کے منفی اثرات پیدا ہوں گے۔
