کوہاٹ: پولیس لائن کے قریب دھماکہ، 10 افراد ہلاک
،تصویر کا ذریعہAFP
- مصنف, عزیز اللہ خان
- عہدہ, بی بی سی اردو ڈاٹ کام
پاکستان کے صوبہ خیبر کے ضلع کوہاٹ میں پولیس لائن کے قریب ہونے والے دھماکے میں کم سے کم 10 افراد ہلاک اور 17 زخمی ہوگئے ہیں۔
دھماکہ کوہاٹ میں پولیس لائن کے قریب واقع پشاور چوک پر ہوا۔
جس جگہ دھماکہ ہوا ہے وہ کوہاٹ کا مصروف ترین مقام ہے اور یہاں سے زیادہ تر گاڑیاں ہنگو جاتی ہیں۔
دھماکے کے وقت بھی مختلف علاقوں کو جانے والی گاڑیاں یہاں سے گزر رہی تھیں۔
پولیس کا کہنا ہے کہ دھماکہ ٹائم بم سے کیا گیا تاہم ابھی تک یہ واضح نہیں ہوا ہے کہ حملے میں کسے نشانہ بنایا گیا۔
پولیس کے مطابق دھماکے میں زخمی اور ہلاک ہونے والوں کی لاشیں ڈسٹرکٹ ہسپتال پہنچا دی گئی ہیں۔
سکیورٹی فورسز نے دھماکے کی جگہ کو گھیرے میں لے لیا اور امدادی کارروائیاں اور تحقیقات شروع کر دی گئیں۔
،تصویر کا ذریعہ
سرکاری خبر رساں ادارے کے مطابق وزیرِاعظم نواز شریف نے واقعے کی مذمت کی ہے۔
End of سب سے زیادہ پڑھی جانے والی
خیال رہے کہ کوہاٹ اور اس کے متصل ضلع ہنگو کو شیعہ سنی کشیدگی کے سلسلے میں حساس علاقہ تصور کیا جاتا ہے۔
گذشتہ سال نومبر میں کوہاٹ شہر میں سنی مسلک سے تعلق رکھنے والے افراد پر ایک امام بارگاہ کے قریب فائرنگ کے نتیجے میں دو افراد ہلاک اور تین زخمی ہوئے تھے۔ سنی مسلک کے مسلمانوں نے راولپنڈی میں دس محرم کو ہونے والے فرقہ وارانہ تشدد کے خلاف جلوس نکالا تھا۔
نومبر میں فرقہ وارانہ کشیدگی بڑھنے کے خطرے کے پیشِ نظر حکام نے ہنگو اور کوہاٹ کے مختلف علاقوں میں کچھ وقت کے لیے کرفیو نافذ کیا تھا جسے بعد میں ہٹا لیا گیا۔
خیال رہے کہ محرم الحرام سے پہلے خیبر پختونخوا میں جن چار اضلاع کو انتہائی حساس قرار دیا گیا تھا ان میں کوہاٹ بھی شامل تھا۔
دیگر حساس اضلاع میں پشاور، ڈیرہ اسماعیل خان اور ہنگو شامل تھے۔
