اجتماعی قبروں کی دریافت کے خلاف احتجاج
- مصنف, حسن کاظمی
- عہدہ, بی بی سی اردو ڈاٹ کام، کراچی
پاکستان کے صوبہ سندھ کے دارالحکومت کراچی میں بلوچ ہیومن رائٹس آرگنائزیشن کی جانب سے بلوچستان میں اجتماعی قبروں کی دریافت، وائس فار بلوچ مسنگ پرسنز کی جانب سے جاری لانگ مارچ کے شرکا کو دھمکیاں ملنے اور بلوچستان کے مختلف علاقوں میں جاری فوجی آپریشن کے خلاف ایک احتجاجی جلوس نکالا۔
اس جلوس میں زیادہ تر خواتین اور بچوں شریک تھے جبکہ مردوں کی تعداد کافی کم تھی۔ یہ جلوس کراچی آرٹس کونسل سے شروع ہوکر کراچی پریس کلب پر ختم ہوا جہاں شرکا نے ایک احتجاجی مظاہرہ بھی کیا۔
اس موقع پر بلوچ ہیومن رائٹس آرگنائزیشن کی چیئرپرسن بی بی گُل بلوچ نے کہا کہ بلوچستان میں انسانی حقوق کی صورتِ حال ابتر ہے۔
انھوں نے کہا کہ گذشتہ دنوں خضدار کے علاقے توتک میں اجتماعی قبروں سے دریافت ہونے والی مسخ شدہ لاشیں ممکنہ طور پر ان بلوچ لاپتہ افراد کی ہوسکتی ہیں جنھیں پاکستانی ریاست کے خفیہ اداروں کی جانب سے بنائے گئے ڈیتھ سکواڈ نے بلوچستان کے مختلف علاقوں سے اغوا کیا تھا۔
انھوں نے مطالبہ کیا کہ اگر لاپتہ افراد کسی جرم میں ملوث ہیں تو انھیں عدالت کے سامنے پیش کیا جائے اور صفائی کا موقع دیا جائے۔
ان کا کہنا تھا کہ منگل ہی کو آواران کے علاقے مشکے میں چھاپے کے دوران کئی افراد کو اغوا کر کے غائب کر دیا گیا ہے۔
اس موقع پر انھوں نے مقامی ذرائع ابلاغ پر بھی کڑی نکتہ چینی کرتے ہوئے کہا کہ بلوچستان کی سنگین صورتِ حال کا ادراک ہونے کے باوجود مقامی میڈیا اس بارے میں خاموش ہے۔
بی بی سی سے بات کرتے ہوئے بی بی گُل بلوچ نے کہا کہ وینا ملک کے بارے میں تو ٹی وی پر ایک ایک گھنٹے کے پروگرام چلتے ہیں مگر بلوچوں کی لاشیں گر رہی ہیں اور کوئی توجہ نہیں دے رہا۔
End of سب سے زیادہ پڑھی جانے والی
یاد رہے کہ بلوچ ہیومن رائٹس آرگنائزیشن سمیت بلوچ قوم پرست تنظیموں کا کہنا ہے کہ خضدار کے علاقے توتک میں ملنے والی اجتماعی قبروں سے اب تک ڈیڑھ سو سے زیادہ لاشیں ملنے کا دعویٰ کیا ہے تاہم ہیومن رائٹس کمیشن آف پاکستان نے پیر کو جاری اپنے ایک بیان میں 15 لاشیں ملنے کا ذ کر کیا تھا۔
