پاکستان کے لیے 6.7 ارب ڈالر کے قرضے کی منظوری

عالمی مالیاتی ادارے آئی ایم ایف نے پاکستان کو معاشی بحران سے بچنے اور معاشی اصلاحات میں مدد دینے کے لیے 6.7 ارب ڈالر کے قرضے دینے کی منظوری دی ہے۔

اس قرضے کی 54 کروڑ ڈالر کی پہلی قسط جلد جاری کی جائے گی جبکہ بقایہ رقم اگلے تین برسوں میں اقساط کی صورت میں دی جائے گی۔

یہ قرضہ پاکستان کو اپنے زرمبادلہ کے ذخائر بہتر بنانے میں مدد دے گا۔

حکومت پاکستان نے ملک میں بڑے پیمانے پر ہونے والی ٹیکس چوری اور توانائی کے شعبے میں اصلاحات پر رضامندی ظاہر کی ہے۔

<link type="page"><caption> آئی ایم ایف کی طرف واپسی ناگزیر</caption><url href="http://www.bbc.co.uk/urdu/interactivity/2013/01/130111_pakistan_imf_zs.shtml" platform="highweb"/></link>

<link type="page"><caption> ’ڈالر کی قیمت سو روپے سے تجاوز کر جائے گی‘</caption><url href="http://www.bbc.co.uk/urdu/pakistan/2012/12/121204_dollar_100_rupee_rwa.shtml" platform="highweb"/></link>

آئی ایم ایف کا کہنا ہے کہ قرض کے اس معاہدے کی پاسداری کرنے سے پاکستان کو دوسرے اداروں اور ممالک سے قرضوں کے حصول میں مدد ملے گی۔

ادارے کا یہ بھی کہنا ہے کہ تمام تر مشکلات کے باوجود پاکستان وسائل سے مالامال ملک ہے اور اس پروگرام سے اسے ان وسائل سے فائدہ اٹھانے میں مدد ملے گی۔

پاکستان کی معیشت پچھلے کئی دہائیوں سے مشکلات سے دوچار ہے اور معاشی اصلاحات نہ ہونے اور غیرپیداواری اخراجات کی بھرمار ہونے کی وجہ سے اسکی معیشت کا بڑی حد تک انحصار مغربی ممالک اور عالمی مالیاتی اداروں کی امداد اور قرضوں پر ہی رہا ہے۔