پاکستان کی الیکشن کمیشن نے آئندہ عام انتخابات کے الیکشن شیڈول کا اعلان کردیا ہے جس کے تحت امیدواروں کو انتخابی مہم چلانے کے لیے اکیس دن ملیں گے۔
ریڈیو پاکستان کے مطابق شیڈول کے مطابق ریٹرننگ افسران 23 مارچ کو نوٹسز جاری کریں گے اور 24 سے 29 مارچ تک کاغذات نامزدگی جمع کرائے جاسکیں گے۔
شیڈول کے مطابق کاغذات نامزدگی کی جانچ پڑتال تیس مارچ سے پانچ اپریل تک ہوگی۔
الیکشن کمیشن کے شیڈول کے مطابق چھ اپریل سے انیس اپریل تک امیدواروں کے خلاف اعتراضات جمع کرائے جا سکیں گے اور ان اعتراضات پر فیصلے دس سے سولہ اپریل تک کیے جائیں گے۔
امیدوار کے پاس اپنا نام واپس لینے کے لیے سترہ اپریل تک کا وقت ہوگا اور شیڈول کے مطابق اٹھارہ اپریل کو امیدواروں کی حتمی فہرست جاری کی جائے گی۔
حتمی امیدواروں کو اکیس دن انتخابی مہم چلانے کے ملیں گے اور گیارہ مئی کو قومی اور صوبائی اسمبلیوں کے انتخابات ہوں گے۔
دوسری جانب پاکستان کے الیکشن کمیشن کا کہنا ہے کہ آئندہ عام انتخابات میں حصہ لینے والے امیدواروں کی جانچ پڑتال نادرا، نیب، ایف بی آر اور سٹیٹ بینک بارہ گھنٹوں میں کریں گے۔
ریڈیو پاکستان کے مطابق اس بات کا اعلان ایڈیشنل سیکرٹری الیکشن کمیشن افضل خان نے میڈیا سے بات کرتے ہوئے کیا۔
افضل خان کا کہنا تھا کہ جب تک نیشنل ڈیٹا رجسٹریشن ایجنسی یعنی نادرا، قومی احتساب بیورو (نیب)، فیڈرل بورڈ آف ریونیو اور سٹیٹ بینک امیدوار کو کلیئر نہیں کرتے وہ امیدوار انتخابات لڑنے کے اہل نہیں ہو گا۔
انہوں نے مزید بتایا کہ الیکشن کمیشن میں امیدواروں کی معلومات نیشنل ڈیٹا رجسٹریشن ایجنسی یعنی نادرا، قومی احتساب بیورو (نیب)، فیڈرل بورڈ آف ریونیو اور سٹیٹ بینک کے ساتھ شیئر کرنے کے لیے آئی ٹی ڈیسک تشکیل دے دیا گیا ہے۔
