مسلح افراد اور سکیورٹی فورسز کے درمیان فائرنگ کا تبادلہ بھی ہوا لیکن ملزمان فرار ہونے میں کامیاب ہو گئے
پاکستان کے صوبے بلوچستان کے دارالحکومت کوئٹہ کے قریب مسلح افراد نے دو مسافر بسوں پر حملہ کر کے تین افراد کو ہلاک کردیا ہے۔
اطلاعات کے مطابق اس حملے میں تین مسافر ہلاک ہوئے ہیں جبکہ دو مسافر زخمی ہوئے ہیں۔ مسلح افراد نے دو مسافروں کو اغوا بھی کیا ہے۔
مسافر بسیں کوئٹہ سے لاہور اور صادق آباد جا رہی تھیں کہ کوئٹہ سے تقریباً پچاس کلومیٹر کے فاصلے پر واقع مچھ کے مقام پر مسلح افراد نے بسوں پر فائرنگ شروع کر دی۔
فائرنگ کے نتیجے میں زخمی ہونے والے مسافروں کو مچھ کے ہسپتال منتقل کر دیا گیا ہے۔
ذرائع ابلاغ کے مطابق نامعلوم افراد نے ان بسوں پر فائرنگ کی۔ تاہم ایک بس بچ کر نکلنے میں کامیاب رہی لیکن دوسری بس کے ٹائر پھٹ گئے جس کے باعث بس رک گئی۔
نامعلوم افراد کی فائرنگ سے تین مسافر ہلاک جبکہ دوافراد زخمی ہوگئے اور مسلح افراد بس سے دو مسافروں کو اغوا کرکے بھی لے گئے۔
واقعے کے بعد لیویز اور ایف سی کی بھاری نفری موقع پر پہنچ گئی۔
مسلح افراد اور سکیورٹی فورسز کے درمیان فائرنگ کا تبادلہ بھی ہوا لیکن ملزمان فرار ہونے میں کامیاب ہو گئے۔
