اصغر خان کیس: صدر کے دفتر کو فریق بنا لیا گیا

پاکستان کی سپریم کورٹ نے آئی ایس آئی کی طرف سے سیاست دانوں میں مبینہ طور پر رقوم کی تقسیم سے متعلق مقدمے میں موجودہ صدرِ مملکت کے دفتر کو فریق بنانے سے متعلق درخواست سماعت کے لیے منظور کرلی ہے۔

اس ضمن میں صدر کے پرنسپل سیکرٹری کو نوٹس بھی جاری کیا جائے گا۔

عدالت کا کہنا تھا کہ صدر پاکستان کا عہدہ وفاق کی علامت ہوتا ہے اور ایوان صدر میں ایسے سیاسی سیل قائم ہونے سے اس ائینی عہدے پر اُنگلیاں اُٹھنا شروع ہوجاتی ہیں۔

عدالت نے اُس وقت کے صدر غلام اسحاق خان کے پرنسپل سیکرٹری روئیداد خان کو بھی فریق بنانے سے متعلق درخواست سماعت کے لیے منظور کرلی ہے۔ یہ دونوں درخواستیں پاکستانی فضائیہ کے سابق سربراہ ائرمارشل ریٹائرڈ اصغر خان کی طرف سے دائر ہوئیں تھیں۔

چیف جسٹس افتخار محمد چوہدری کی سربراہی میں سپریم کورٹ کے تین رکنی بینچ نے انٹرسروسز انٹیلیجنس یعنی آئی ایس آئی کی طرف سے سیاست دانوں میں مبینہ طور پر رقوم کی تقسیم سے متعلق درخواست کی سماعت کے دوران کہا کہ صدر مملکت وفاق کی علامت ہونے کے علاوہ پاکستانی افواج کے سپریم کمانڈر بھی ہیں اور اگر اس طرح کے سیاسی سیل ایوان صدر میں ہوں گے تو اس کے اثرات فوج پر بھی پڑیں گے۔

یاد رہے کہ لاہور ہائی کورٹ میں بھی صدر کے دو عہدوں اور اُنہیں وہاں پر سیاسی سرگرمیوں کے انعقاد سے روکنے کے لیے بھی درخواستیں زیر سماعت ہیں۔

درخواست گُزار کے وکیل سلمان اکرم راجہ کا کہنا تھا کہ اُس وقت کے صدر غلام اسحاق خان کا یہ ذاتی فعل ہے اور اس میں موجودہ صدر کا کوئی کردار نہیں ہے جس پر چیف جسٹس نے کہا کہ عدالت کسی کو ذاتی حثیت میں نوٹس جاری نہیں کر رہی بلکہ ایک آئینی عہدے سے متعلق جو خدشات پائے جاتے ہیں اُن کو دور کرنا ہے۔

اُنہوں نے اپنے ریمارکس میں اس بات کا بھی عندیہ دیا کہ اس درخواست کے فیصلے میں عدالت اس بات کو بھی واضح کر دے گی کہ ائندہ کوئی بھی سیاسی سیل ایوان صدر میں نہ ہو۔

ہمارے نامہ نگار نے بتایا کہ بینچ میں موجود جواد ایس خواجہ نے درخواست گُزار کے وکیل کو مخاطب کرتے ہوئے کہا کہ جس طرح سابق صدر کے بارے میں کہا جاتا ہے کہ سیاست دانوں میں رقوم کی تقسیم اُن کا ذاتی فعل ہے اسی طرح خفیہ ایجنسیاں بھی یہ کہہ سکتی ہے کہ اُنہوں نے یہ فعل اپنی مرضی سے کیا۔

سماعت کے دوران سیکریٹری دفاع لیفٹیننٹ جنرل ریٹائرڈ آصف یاسین ملک کے دستخط سے جاری کردہ بیان عدالت میں جمع کروایا گیا جس میں ایک بار پھر کہا گیا ہے کہ اس وقت وزارت کے کسی بھی ماتحت ادارے میں سیاسی سیل کام نہیں کر رہا ہے۔

واضح رہے کہ بدھ کو سپریم کورٹ نے فوج کے خفیہ اداروں میں سیاسی سیل کے قیام سے متعلق سیکرٹری دفاع کے بیان کو غیر تسلی بخش قرار دے کر مسترد کر دیا تھا۔

عدالت کا کہنا تھا کہ اس بیان کے مندرجات مبہم ہیں جبکہ سیکرٹری دفاع کو اس ضمن میں جامع جواب جمع کروانے کا حکم دیا ہے۔

عدالت میں سیکریٹری داخلہ خواجہ صدیق اکبر بھی عدالت میں پیش ہوئے اور اُنہوں نے بتایا کہ انٹیلیجنس بیورو یعنی آئی بی وزارت داخلہ کے نہیں بلکہ کیبنٹ ڈویژن کے ماتحت ہے جس کی نگرانی وزیر اعظم خود کرتے ہیں۔ اس لیے اُن کے علم میں نہیں ہے کہ اس ایجنسی میں کوئی سیاسی سیل ہے بھی کہ نہیں۔ عدالت نے سیکرٹری داخلہ کو معلومات اکھٹی کرکے ایک تفصیلی رپورٹ پیش کرنے کا حکم دیا۔

عدالت نے اس درخواست کی سماعت کے دوران کہا کہ سنہ اُنیس سو ستانونے میں اس درخواست کی سماعت کے دوران اس بات کا اعتراف کیا گیا تھا کہ آئی ایس آئی میں سیاسی سیل موجود ہے جبکہ اس ضمن میں اٹارنی جنرل کی طرف سے بھی ایک جواب عدالت میں جمع کروایا گیا تھا کہ سنہ اُنیس سو پچھتر میں آئی ایس آئی میں سیاسی سیل قائم ہوا تھا تاہم اس کا نوٹیفیکیشن ابھی تک عدالت میں پیش نہیں کیا گیا۔

عدالت نے سماعت پندرہ اکتوبر تک ملتوی کردی ہے۔