پاکستان میں عیسائی اقلتیت سکیورٹی خدشات کا شکار ہے
توہین مذہب کے الزام میں گرفتار عیسائی لڑکی رمشا کی ذہنی حالت جانچنے اور اُن کی عمر معلوم کرنے کے لیے انہیں میڈیکل بورڈ کے سامنے پیش کیا گیا ہے۔
ادھر حقوقِ انسانی کی عالمی تنظیم ایمنٹسی انٹرنیشنل نے حکومتِ پاکستان سے رمشا کو تحفظ فراہم کرنے اور توہینِ مذہب کے قوانین میں اصلاحات کا مطالبہ دہرایا ہے۔
پولی کلینک ہسپتال کے جوائینٹ ایگزیکٹو ڈائریکٹر محمد زاہد کی سربراہی میں قائم کیے گئے چار رکنی بورڈ نے پیر کو رمشا کا طبی معائنہ کرنے کے علاوہ اُس کے مختلف ٹیسٹ بھی کیے۔
ملزمہ کو سخت حفاظتی پہرے میں راولپنڈی کی اڈیالہ جیل سے ہسپتال لایاگیا۔ اس موقع پر ہسپتال اور اُس کے گرونواح میں سخت خفاظتی اقدامات کیے گئے تھے۔
میڈیکل بورڈ نے ایک گھنٹے سے زائد وقت تک رمشا کا طبی معائنہ کیا جس کے بعد اُنہیں سخت حفاظتی پہرے میں واپس اڈیالہ جیل منتقل کر دیا گیا۔ ہسپتال کے ایک اہلکار کے مطابق یہ میڈیکل بورڈ تین روز کے اندر اندر حتمی رپورٹ متعقلہ عدالت میں پیش کرے گا۔
رمشا کے وکیل طاہر چوہدری نے بی بی سی اردو کے نامہ نگار شہزاد ملک سے گفتگو کرتے ہوئے کہا کہ اُن کی موکلہ کی ضمانت کی درخواست کی سماعت اٹھائیس اگست کو اسلام آباد کی ایک مقامی عدالت میں ہوگی۔
اُنہوں نے کہا کہ ضمانت کی اس درخواست میں یہ موقف اختیار کیا گیا ہے کہ اس واقعہ کے نتیجے میں درج کیا جانے والہ مقدمہ توہین مذہب پر پورا نہیں اُترتا اور دوسرا یہ کہ یہ معاملہ ابھی مزید تفتیش طلب ہے۔ اُنہوں نے کہا کہ کمسنی کی وجہ سے بھی اُس کی موکلہ کو عدالت سے ریلیف ملنے کا امکان ہے۔
"رمشا پر قائم مقدمہ پاکستان میں قانون کی حکمرانی کے بےاثر ہونے اور توہینِ مذہب کے ملزمان کو درپیش خطرات کا ثبوت ہے۔"
پولی ٹرسکاٹ، ایمنٹسی انٹرنیشنل
طاہر چوہدری کے مطابق اُنہوں نے چند روز قبل اڈیالہ جیل میں رمشا سے ملاقات کی تھی جو رو رہی تھی اور کہہ رہی تھی کہ اُن کی جلد از جلد ضمانت کروائی جائے۔
ذرائع کے مطابق رمشا کی ضمانت کی درخواست کی سماعت کے موقع پر عیسائیوں کے ایک گروپ کی طرف سے بھی ایک وکیل عدالت میں پیش کیا جائے گا۔
قومی ہم آہنگی سے متعلق وزیراعظم کے مشیر پال بھٹی نے اس اُمید کا اظہار کیا ہے کہ رمشا کو بہت جلد رہا کردیا جائے گا جبکہ امریکہ اور فرانس نے اس مقدمے پر افسوس کا اظہار کرتے ہوئے رمشا کی فوری رہائی کا مطالبہ کیا ہے۔
اس مقدمے کی تفتیش کرنے والی پولیس کی ٹیم نے پیر کے روز بھی جائے وقوع کا دورہ کیا اور آبادی کے مکینوں سے اس واقعہ سے متعلق مزید معلومات حاصل کیں۔ پولیس نے اس مقدمے کا حمتی چالان ابھی تک عدالت میں جمع نہیں کروایا ہے۔
پیر کو ایمنسٹی انٹرنیشنل کی ڈائریکٹر برائے جنوبی ایشیا پولی ٹرسکاٹ نے کہا ہے کہ رمشا پر قائم مقدمہ پاکستان میں قانون کی حکمرانی کے بےاثر ہونے اور توہینِ مذہب کے ملزمان کو درپیش خطرات کا ثبوت ہے۔
انہوں نے حکومتِ پاکستان سے مطالبہ کیا کہ توہینِ مذہب کی ملزمہ مسیحی بچی کو مکمل تحفظ فراہم کیا جائے اور ملک میں اس حوالے سے موجود قوانین میں اصلاحات کی جائیں۔
