مریم نواز کے مزید جسمانی ریمانڈ کی درخواست مسترد
- مصنف, عباد الحق
- عہدہ, صحافی
پنجاب کے صوبائی دارالحکومت لاہور کی احتساب عدالت نے نیب کی طرف سے سابق وزیر اعظم نواز شریف کی بیٹی مریم نواز اور بھتیجے یوسف عباس کے مزید جسمانی ریمانڈ کی درخواست مسترد کر دی ہے۔
احتساب عدالت نے مریم نواز اور ان کے چچا زاد بھائی یوسف عباس کو جوڈیشل ریمانڈ پر جیل بھیج دیا ہے۔
شریف خاندان کے چار ارکان کے خلاف معاملہ اس وقت احتساب عدالت میں لاہور میں زیر سماعت ہے۔ شہباز شریف پہلے ہی ضمانت پر ہیں جبکہ ان کے بیٹے حمزہ شہباز جوڈیشل ریمانڈ پر ہیں۔ اب مریم نواز اور یوسف عباس کا بھی جسمانی ریمانڈ ختم ہوگیا ہے۔
مزید پڑھیے
مریم نواز اور یوسف عباس چودھری شوگر ملز کے ذریعے منی لانڈرنگ کے الزامات کا سامنا کر رہے ہیں اور تفتیش کے لیے نیب کی تحویل میں رہے ہیں۔
End of سب سے زیادہ پڑھی جانے والی
مریم نواز کا جسمانی ریمانڈ ختم ہونے پر انہیں جوڈیشل ریمانڈ پر کوٹ لکھپت اُسی جیل میں منتقل کیا گیا ہے جہاں ان کے والد اور سابق وزیر اعظم نواز شریف اپنے خلاف ریفرنس کی سزا کاٹ رہے ہیں۔ اسی جیل میں والد سے ملاقات کے دوران نیب نے انہیں گرفتار کیا تھا.
مریم نواز کے والد اور سابق وزیر اعظم نواز شریف اپنے خلاف ریفرنس میں دی جانے والی سزا کی وجہ سے کوٹ لکھپت جیل میں ہیں۔
مریم نواز کو گذشتہ ماہ نو اگست کو اس وقت گرفتار کیا گیا جب وہ اپنے والد نواز شریف سے کوٹ لکھپت جیل میں ملاقات کر رہی تھیں۔
قانونی ماہرین کے مطابق جوڈیشل ریمانڈ ہونے پر اب مریم نواز اور یوسف عباس کو قانونی حق مل گیا ہے کہ وہ اپنی رہائی کیلئے ضمانت کی درخواست دائر کرسکتے ہیں۔
،تصویر کا ذریعہPMLN
ماہرین قانون کے مطابق مریم نواز اور چچا زاد بھائی ضمانت کے لیے لاہور ہائیکورٹ سے رجوع کرسکتے ہیں۔
مریم نواز اور ان کے چچا زاد بھائی یوسف عباس لگ بھگ 47 دنوں تک تفتیش کی خاطر نیب کی تحویل میں رہے۔
مریم نواز اور یوسف عباس کو سات دنوں کے جسمانی ریمانڈ کی معیاد ختم ہونے پر احتساب عدالت میں پیش کیا گیا. اس موقع پر جوڈیشل کمپلیکس میں کڑے حفاظتی انتظامات کیے گئے اور جوڈیشل کمپلیکس کو آنے والے راستوں کو کنٹینرز، رکاوٹوں اور خار دار تاروں بند کیا گیا۔
یہ پہلا موقع ہے جب مریم نواز اور یوسف عباس کے علاوہ شریف خاندان کے کسی دوسرے رکن کو احتساب عدالت میں پیش نہیں کیا. اس سے پہلے مریم نواز، ان کے۔ چچا شہبا شریف اور کزن حمزہ شہباز کے خلاف ریفرنس کی سماعت ایک ہی تاریخ بلکہ ایک ہی عدالت میں ہوئی۔
مواد دستیاب نہیں ہے
Facebook مزید دیکھنے کے لیےبی بی سی. بی بی سی بیرونی سائٹس پر شائع شدہ مواد کی ذمہ دار نہیں ہے.Facebook پوسٹ کا اختتام
مریم نواز کی احتساب عدالت میں پیشی کے موقع پر عدالت آنے والوں میں سابق سپیکر سردار ایاز صادق اور ڈپٹی سپیکر مرتضی جاوید قومی اسمبلی کے علاوہ سینیٹر پرویز رشید، خرم دستگیر، محمد شبیر، طلہ چودھری، ڈاکٹر طارق فیصل، حنا بٹ اور مریم اورنگ زیب نمایاں تھے۔
