آئیوری کوسٹ کے طیاروں نے میں نو فرانسیسی امن فوجیوں کو ہلاک کر دیا تھا۔

آئیوری کوسٹ میں گزشتہ کئی روز سے تشدد کی کارروائیوں میں ا ضافہ ہو گیا تھا۔فرانسیسی امن فوج کی طرف سے آئیوری کوسٹ کی فوج کے خلاف جوابی کارروائی کے بعد مظاہرین نے ملک میں فرانسیسیوں کو نشانہ بنانا شروع کر دیا تھا۔

مظاہرین نے ابیجان میں فرینچ سکول اور ایک فرانسیسی بک سٹال کو نذر آتش کر دیا تھا۔فرانسیسی امن فوج نے آئیوری کوسٹ میں مقیم فرانسیسی باشندوں کو محفوظ مقامات پر پہنچایا تھا۔

جنوبی افریقہ کے صدر تھابو اممبیکی آئیوری کوسٹ جا رہے ہیں تاکہ بگڑتے ہوئے حالات کو سدھارا جا سکے۔ جنوبی افریقہ کے صدر آئیوری کوسٹ کا دورہ افریقی یونین کی درخواست پر کر رہے ہیں۔

اس سے پہلے اقوام متحدہ نے آئیوری کوسٹ کی حکومت سے کہا تھا کہ اپنے سرکاری ٹیلیوژن پر کولوگوں کو فرانس کے امن فوجیوں کے خلاف احتـجاج پر اکسانے سے گریز کریں۔

اس سے پہلے فرانس نے اپنے فوجیوں کی ہلاکت کے بعد جوابی کارروائی کرتے ہوئے آئیوری کوسٹ کے ہوائی اڈے پر حملہ کر کے روسی ساخت کے دو حکومتی طیاروں اور تین ہیلی کاپٹروں کو تباہ کر دیا تھا اور ابیجان کے بین الاقوامی ہوائے اڈے کا کنٹرول سنبھال لیا تھا۔

ایک فرانسیسی ہیلی کاپٹر نے بظاہر ان نوجوانوں پر گرینیڈ پھینکے اور ان کی پیش قدمی کو روکنے کے لیے توپوں سے گولے داغے۔ ابیجان اور دارالحکومت یموکوسکرا سے زبر دست دھماکوں کی آوازیں سنی گئیں۔

فرانسیسی حکومت نے کہا ہے کہ وہ آئیوری کوسٹ کے صدر لوغاں گباگبو کو ذاتی طور پر ملک میں امن و امان برقرار رکھنے کا ذمہ دار ٹھہرائے گی۔

اقوام متحدہ نے آئیوری کوسٹ میں امن فوج پر حملے کی مذمت کی ہے جس میں نو فرانسیسی فوجی اور ایک امریکی شہری ہلاک ہوئے۔

اقوام متحدہ کی سلامتی کونسل نے فرانسیسی اور بین الاقوامی امن فوج کے دستوں کے ساتھ ہمدردی کا بھی اظہار کیا ہے۔

سلامتی کونسل کے ایک ہنگامی اجلاس کے بعد جاری ہونے والے ایک متفقہ بیان میں آئیوری کوسٹ میں تمام فوجی کارروائیوں کو بند کرنے کا مطالبہ کیا گیا ہے۔

بیان میں فرانس کے ایک اقدام کی بھی حمایت کی گئی جس کے تحت فرانس نے آئیوری کوسٹ کے جنگی طیاروں اور ہیلی کاپٹرروں کو تباہ کر دیا۔

اقوام متحدہ کے امن کارروائیوں کے انڈرسیکریٹری جنرل ژاں ماغی گوہینو نے آئیوری کوسٹ کے حکام سے کہا ہے کہ نفرت انگیز پیغامات نشر کرنا بند کر دے۔

اقوام متحدہ میں فرانس کے سفیر ژاں مارک دلا سابلی ایغ نے مطالبہ کیا ہے کہ آئیوری کوسٹ کی حکومت کی طرف سے اسلحہ خریدنے پر پابندی عائد کر دی جائے۔

دوسری طرف آئیوری کوسٹ کی حکمران جماعت کے ترجمان اسین ڈوبہ نے بی بی سی کو بتایا کہ فرانس آئیوری کوسٹ میں، ان کے بقول‘ حکومت کی تبدیلی چاہتا ہے۔

آئیوری کوسٹ کی حکومت کے طیاروں نے ایک فضائی حملے میں علاقے میں فرانسیسی امن فوج کے ایک مرکز پر حملہ کر کے نو فوجیوں کو ہلاک اور تئیس کو زخمی کر دیا تھا۔

ایک حکومتی ترجمان نے اس حملے کو ایک غلطی قرار دیا ہے۔

فرانس نے اقوام متحدہ کے تحت اپنی فوج کو علاقے میں امن فوج کے طور پر بھیجا ہوا ہے۔ اس وقت چار ہزار فرانسیسی فوجی آئیوری کوسٹ میں امن فوج کے فرائض انجام دے رہے ہیں۔

فرانس نےآئیوری کوسٹ کے دارلخلافہ یاموسکورو کے ہوائی اڈے پر حملہ کیا جس میں روسی ساخت کے دو سخوئی طیارے تباہ ہو گئے۔ بی بی سی کے نمائندے کے مطابق تباہ ہونے والے طیارے آئیوری کوسٹ کے پاس موجود آخری کارآمد طیارے تھے۔

فرانسیسی حکومت نے بڑھتے ہوئے تشدد کی بنا پر علاقے میں مزید فوجیں اور تین لڑاکا طیارے بھیجنے کا فیصلہ کیا ہے۔

آئیوری کوسٹ میں اقوام متحدہ کے نمائندے جین وکٹر نکولو نے کہا ہے کہ فرانس کے فوجی دستے نےآئیوری کوسٹ کے طیاروں کی طرف سے حملے کے بعد کارروائی کی ہے۔

افریقی یونین نے سنیچر کو حکومت اور باغیوں سے اپیل کی ہے کہ وہ تحمل کا مظاہرہ کریں اور جنگ بندی کے اس معاہدے پر عمل کریں جس پر انہوں نے پچھلے سال دستخط کیے تھے۔

پچھلے ہفتے باغیوں نے حکومت پر الزام لگایا تھا کہ حکومتی فوج باغیوں کے خلاف کارروائی کرنے کی تیاری کر رہی ہے۔ باغیوں کے نمائندوں نے حکومتی عہدوں سے استعفیٰ دے دیا تھا۔