رسمان نے الزام سے انکار کیا ہے۔

ستائیس سالہ رسمان گوناوان کو انڈونیشیا کی ایک عدالت نے یہ سزاگزشتہ سال میریٹ ہوٹل جکارتہ میں ہونے والے بم دھماکہ کے سلسلہ میں سنائی ہے۔ اس دھماکےمیں بارہ افراد کے ساتھ ایک خودکش حملہ کار بھی ہلاک ہوا تھا۔

رسمان گوناوان پر الزام ہے کہ اس نے مذکورہ دھماکے کے لیے پاکستان سے تیس ہزار ڈالر اپنے ساتھیوں کو انڈونیشیا بھیجے تھے۔عدالت کےمطابق رسمان پر یہ الزام ثابت ہو گیا ہے کہ اس نے دوسروں کو دہشت گردی پھیلانے کے لیے رقم فراہم کی تھی۔

رسمان نے جرم سے انکار کیا ہے تاہم ابھی تک اس نے یہ نہیں بتایا کہ آیا وہ عدالت کے آج کے فیصلہ کے خلاف اپیل کرنے کا ارادہ رکھتا ہے۔

رسمان کو چار دیگر طلباء کے ساتھ پاکستان سے گرفتار کر کے انڈونیشیا کے حوالے کیا گیا تھا جبکہ اس کے بھائی حمبلی کوگزشتہ برس تھائی لینڈ سے گرفتار کیا گیا تھا جوان دنوں امریکہ کی تحویل میں ہے۔

حمبلی کا پورا نام رضوان عیسام الدین ہے اور بتایا جاتا ہے کہ اس کا تعلق جماء اسلامیہ سے ہے۔