سہیل سانگی

ارباب رحیم وزیر اعلی بننے کے بعد اپنے آبائی ضلع میں پہلی مرتبہ آئے ہیں۔

وہ اتوار کی شام صحرائے تھر کے ضلع ہیڈکوارٹر مٹھی میں ایک بڑے جلسے سے خطاب کر رہے تھے۔

ارباب رحیم وزیر اعلیٰ بننے کے بعد اپنے آبائی ضلع میں پہلی مرتبہ آئے ہیں۔ انہوں نے مسلم لیگ کے امیدوار شوکت عزیز کی تھر کے حلقے این اے 229 میں انتخابی مہم کا آغاز کرتے ہوئے کہا کہ تھر کے لوگوں نے صدر جنرل پرویز مشرف کے اعتماد پر پورا اترتے ہوئے شوکت عزیز کو نشست دی ہے اور یہ کوئی سستا سودا نہیں ہے۔

انہوں نے کہا کہ اپوزیشن کو چاہیے کہ وہ شوکت عزیز کو بلامقابلہ کامیاب کرائیں۔ انہوں نے تھر کے لوگوں سے کہا کہ وہ ہمت کا مظاہرہ کریں اور شوکت عزیز کے مقابلہ میں جو بھی امیدوار آئے اس کو تجویز کنندہ اور تائید کنندہ بھی نہ ملے۔

ماضی میں غلام مصطفی جتوئی اور محمد خان جونیجو کو پنجاب نے نشستیں دی تھیں لیکن میں نے تھر کی یہ نشست پرویز مشرف کو دی ہے جن کا تعلق کراچی سے ہے وزیر اعلی سندھ ارباب غلام رحیم

انہوں نے کہا کہ یہ تھر کے عوام کی خوش قسمتی ہے کہ وزیر اعلی بھی تھر سے ہے اور اب وزیر اعظم بھی تھر سے ( منتخب) ہونے جا رہا ہے۔

وزیر اعلیٰ نے کہا کہ ماضی میں غلام مصطفی جتوئی اور محمد خان جونیجو کو پنجاب نے نشستیں دی تھیں لیکن میں نے تھر کی یہ نشست پرویز مشرف کو دی ہے جن کا تعلق کراچی سے ہے اور اب یہ تھر کے لوگوں کا فرض ہے کہ انہیں بلامقابلہ کامیاب بنائیں-

انہوں نے انکشاف کیا کہ وفاقی حکومت نے حکومت سندھ سے ایک معاہدہ کیا ہے جس کی رو سے تھر کو گیس فراہم کی جائے گی۔

انہوں نے کہا کہ سات جولائی کو مستقبل کے وزیر اعظم سمیت کئی رہنما مٹھی آئیں گے۔ یہ پہلا موقع ہوگا کہ تھر کو سیاسی اور معاشی حوالے سے اتنی اہمیت مل رہی ہے۔

حیدرآباد میں صحافیوں سے بات چیت کرتے ہوئے پیپلز پارٹی پارلیمنٹیرین کے چیئرمین مخدوم امین فہیم نے کہا ہے کہ ارباب غلام رحیم کے بیان سے لگتا ہے کہ وہ جھگڑا کرنا چاہتے ہیں۔ لیکن انہوں نے واضح کیا کہ پی پی پی تھر میں الیکشن کے لئے جھگڑا کرنا نہیں چاہتی اور بغیر اسلحہ کے پرامن طور پر انتخابات لڑنا چاہتی ہے- انہوں نے کہا کہ تھر میں انتخابات شفاف نہیں ہونگے اور جان بوجھ کر امن امان کو خراب کیا جائےگا- تاہم ان کی جماعت انتخابات میں حصہ لے گی-