مقتدیٰ الصدر

کوفہ میں جمعہ کا خطبہ دیتے ہوئے انہوں نے اپنے پیروکاروں سے کہا ہے کہ فی الحال وہ کوئی کارروائی نہ کریں تاہم اگر امریکی فوجیوں نے مسلمانوں کے مقدس مقامات کو نشانہ بنایا تو ان کے پیروکار دشمنوں کے لیے ٹائم بم ثابت ہوں گے۔

امریکی اور اتحادی فوجیوں نے کئی روز سے کوفہ کا محاصرہ کر رکھا ہے اور بظاہر اس کا مقصد مقتدیٰ الصدر کو گرفتار یا قتل کرنا ہے۔

امریکی ایک سے زیادہ بار اس کا واضح الفاظ میں اظہار کر چکے ہیں، تاہم اس کے ساتھ ہی الصدر سے مذاکرات بھی کیے جا رہے ہیں۔

درین اثناء کربلا میں گشت سے لوٹنے والے ایک امریکی اتحادی دستے کی عراقیوں سے جھڑپ ہو گئی جس ایک بلغاریائی فوجی ہلاک اور پانچ عراقی شہری زخمی بتائے جاتے ہیں۔

مقتدیٰ الصدر کے حامیوں کی بڑی تعداد نوجوانوں پر مشتمل ہے

اس دوران ہسپتالوں کے ذرائع سے جمع کیے جانے والے اعداد و شمار کے حوالے سے کہا گیا ہے کہ فلوجہ میں کی جانے والی پہلی کارروائی کے نتیجے میں دو سو ستر عراقی ہلاک ہوئے تھے تاہم اس میں وہ افراد شامل نہیں ہیں جو موقع پر ہی ہلاک ہو گئے یا جنہیں ہسپتال تک بھی نہیں لایا جا سکا۔