فلوجہ شہر سےجہاں امریکی فوج نے عارضی طور پر لڑائی روک دی تھی، رات گئے پھر فائرنگ کے تبادلے کی اطلاعات ملی ہیں۔ تازہ خبروں کے مطابق امریکی فوجی ہیلی کاپٹروں سے زبردست بمباری کی گئی ہے۔

کوفہ اور نجف میں تین عراقیوں کے مارے جانے کی اطلاع ہے جبکہ شمالی شہر موصل میں بھی جھڑپوں کی اطلاع ملی ہے۔بغداد میں فائرنگ اور دھماکوں کی آوازیں سنی گئی ہیں۔

مختلف عراقی شہروں میں لڑائی میں شدت کے باعث نہ صرف امریکی پالیسی پر عراق کے اندر اور باہر سے تنقید کی گئی ہے بلکہ اتحادی ممالک وہاں کی صورتِ حال سے تشویش میں مبتلا ہیں۔

خود عراق کی حکمراں کونسل کے دو ارکان نے فلوجہ میں امریکی طاقت کے استعمال کے خلاف شدید احتجاج کرتے ہوئے استعفیٰ دے دیا ہے جبکہ روس نے کہا ہے کہ امریکہ نے طاقت کا غیر متوازن استعمال کیا ہے۔

اس سلسلے میں صدر جارج بش نے اتحادی ممالک کے سربراہوں سے بات چیت کی ہے جو مبصرین کے بقول اتحاد میں ممکنہ دراڑوں کو روکنے کی ایک کوشش ہے۔

ادھر برطانوی وزیرِ خارجہ جیک سٹرا کے بیان کے بعد کہ عراق میں اتحادی افواج کے خلاف مزاحمت کافی سخت ہے، امریکہ نے بھی اعتراف کیا ہے کہ عراقیوں کی ’بغاوت‘ توقع کے برخلاف شدید ہے۔

امریکی وزیرِ خارجہ کولن پاول نے کہا ہے کہ عراق میں موجود امریکی فوج کو کافی مشکلات پیش آ رہی ہیں تاہم ان کا کہنا تھا کہ عراقیوں کو اس سال جون میں خود مختاری لوٹا دینے کے منصوبے میں کوئی تبدیلی نہیں آئے گی۔

صدر بش کے بارے میں پتہ چلا ہے کہ انہوں نے سپین، پولینڈ اور ال سیلواڈور کے رہنماؤں سے ٹیلی فون پر بات کی ہے اور عراقی مزاحمت پر تبادلۂ خیال کیا ہے۔ ان تینوں ممالک کی افواج اتحادی فوج کا ایک حصہ ہیں۔

بی بی سی کے نامہ نگار کے مطابق صدر بش کو یہ فکر ہے کہ کہیں ایسا نہ ہو کہ ان کے اتحادی عراق سے اپنی فوجیں واپس بلانا شروع کر دیں۔

ادھر شیعہ رہنما مقتدیٰ الصدر نے کہا ہے کہ عراق کے عوام امریکی صدر کی مخالفت پر آمادہ ہوگئے ہیں اور انقلاب سے بچنے کے لئے امریکہ کو چاہیئے کہ وہ عراق سے باہر چلا جائے۔