 |  آیت اللہ سیستانی عراق میں شیعہ اکثریت کے غیر متنازع روحانی پیشوا ہیں |
امریکی قیادت کے تحت کام کرنے والی عراقی کونسل میں شامل شیعہ ارکان کا آیت اللہ سیستانی سے مشورہ جاری ہے۔ اور عراق میں یہ محسوس کیا جا رہا ہے کہ اختلافات کے کچھ ہی گھنٹے بعد عبوری آئین پر سوموار کو دستخط ہونے کا اعلان جو کیا گیا تھا شاید اس پر بھی عمل نہ ہو سکے۔ کونسل کے ذرائع کے حوالے سے کہا جا رہا ہے کہ شیعہ رہنما آئین میں غیر شیعہ آبادی کو تناسب کے برخلاف نمائندگی اور ترجیح دیے جانے پر ناخوش ہیں۔ کہا جا رہا ہے کہ کونسل میں شیعہ نمائندے چاہتے ہیں کہ آئین کے مطابق باری باری صدر بننے والے ارکان پر پانچ رکنی کونسل میں شیعہ نمائندو کی تعداد متناسب ہونی چاہیے۔ اس کے علاوہ غیر شیعہ اقلیت کو آئینی امور پر ویٹو کا اختیار نہیں ہونا چاہیے۔ بتایا گیا ہے کہ آئین میں کرد اقلیت کو بعض معاملات میں ویٹو کا حق دیا گیا ہے۔ بی بی سی کے درایع کا کہنا ہے کہ آئت اللہ سیستانی اس معاملے میں دوٹوک موقف رکھتے ہیں کہ شیعہ عراق کی اکثریت ہیں اور انہیں ہی عراق میں غالب قوت ہونا چاہیے۔ عبوری آئین پر ان اختلافات کی اطلاعات سے قبل کہا گیا تھا کہ عبوری آئین کی توثیق کی تقریب جمعہ کو ہو گی۔ تاہم کونسل کے شیعہ ارکان کے نہ آنے کی وجہ سے اس کے امکانات معدوم ہو گئے ۔ اس کے بعد بتایا گیا تھا کہ تقریب سوموار کو ہو گی اور معاملات طے پا گئے ہیں تاہم شیعہ نمائندے آیت اللہ سیستانی سے اس بارے میں مشورہ جاری رکھیں گے۔ |  وہ ہال جہاں عبوری آئین کی توثیق کی تقریب ہو گی |
یہ بھی بتایا گیا ہے کہ شیعہ ارکان صدارت اور ویٹو کے علاوہ مستقل آئین کی توثیق کرنے والے ریفرنڈم سے متعلق شقوں میں ترامیم کا مطالبہ کر رہے ہیں۔ نامہ نگاروں کا کہنا ہے کہ ان ترامیم سے عراق کی شیعہ آبادی کی پوزیشن مستحکم ہوجائے گی کیونکہ وہ اکثریت میں ہیں، جبکہ اس طرح کرد اور سنی آبادی کو جو اقلیت میں ہے ویٹو کا حق حاصل نہیں رہے گا۔ عبوری آئین کا مقصد اس سال تیس جون تک عراق میں اقتدار قابض امریکی انتظامیہ سے مقامی لوگوں کو منتقل کرنا ہے۔ | 
یہ صفحہ دوست کو ای میل کیجیئے
پرِنٹ کریں
