یہ صفحہ دوست کو ای میل کیجیئے		پرِنٹ کریں

صدام حسین کے اپنے خاندان کے افراد سے رابطے پر زور دیا جائے گا

ریڈ کراس نے عراق میں حکام سے رابطہ کیا ہے کہ انہیں ملک کے معزول صدر صدام حسین سے ملاقات دی جائے۔ امریکہ صدام حسین کو جنگی قیدی قرار دے چکا ہے۔

امریکی حکام نے کہا تھا کہ صدام حسین پر جنہیں دسمبر میں گرفتار کیا گیا تھا جنیوا کنونشن کا اطلاق ہوتا ہے۔

ریڈ کراس نے کہا کہ وہ صدام حسین سے جلد سے جلد ملنا چاہتے ہیں۔

پینٹاگون میں بی بی سی کے نمائندے نِک چائلڈز نےحکام کے حوالے سے بتایا ہے کہ عراقی رہنما کےجنگی قیدی قرار دیئے جانے سے طے ہوگا کہ ان کے خلاف مقدمہ کیسے چلایا جائے گا۔

امریکہ کا کہنا ہے کہ جنگی قیدی قرار دیئے جانے کے بعد ان کے خلاف جنگی جرائم کے تحت مقدمہ چلایا جا سکے گا۔

اُردن میں ریڈ کراس کے ترجمان نے اس بات کی تصدیق کی کہ ان کے ادارے نے عراق کے فوجی اور سِول حکام کو صدام حسین سے ملاقات کی درخواست دی ہے۔

لیکن انہوں نے کہا کہ ملاقات کا وقت اور تاریخ خفیہ مذاکرات کے ذریعے طے کی جائے گی۔

ریڈ کراس کے ترجمان نے بتایا کہ وہ صدام حسین کی صحت کا معائنہ کریں گے اور دیکھیں گے ان کو کن حالات میں رکھا جا رہا ہے اور آیا ان پر تشدد تو نہیں کیا گیا۔

انہوں نے کہا کہ وہ عراقی رہنما کو ان کے خاندان کے افراد سے رابطے کی اجازت دیئے جانے پر زور دیں گے۔