آندھرا پردیش کے وزیر اعلیٰ نے ماؤ نواز باغیوں کے خلاف پولیس کارروائی کی مدافعت کی ہے

بی بی سی کے نامہ نگار عمر فاروق نے بتایا ہے کہ کیمونسٹ پارٹی آف انڈیا کے ایک سینئر رہنما جم پنا نے ٹیلی فون پر بی بی سی بات کرتے ہوئے کہا ہے کہ کاشم پور اور ورنگل میں پولیس کی کارروائیوں کے نتیجے میں نکسل وادیوں کی ہلاکتوں کے بعد ان کی تنظیم نے دوبارہ جوابی حملے شروع کرنے کا فیصلہ کیا ہے۔

ان کا کہنا ہے کہ یہ جوابی حملے پولیس، سرکاری اہلکاروں اور حکمراں پارٹی کانگریس کے رہنماؤں پر کیے جائیں گے۔

انہوں کہا کہ حکومت جنگ بندی کی خلاف ورزی کر رہی ہے تو جنگ بندی کیسے برقرار رہ سکتی ہے اور اب جنگ بندی ختم ہو چکی ہے۔

تاہم انہوں نے کہا کہ اگر حکومت کو اب بھی جنگ بندی میں دلچسپی ہے تو اسے ایک دن کے اندر اعلان کرنا ہو گا کہ وہ جنگ بندی کی خلاف ورزیوں کی تحقیقات کرائے گی۔

دوسری طرف ریاستی وزیر اعلیٰ اور ریاستی پولیس کے سربراہ نے پولیس کی کارروائیوں کی دفاع کیا ہے اور کہا ہے کہ اگر پولیس پر گشت کے دوران فائرنگ ہو گی تو جواب دینا ہی پڑے گا۔