بھارت میں ڈزنی چینلز چار زبانوں میں دستیاب ہونگے

کمپنی ’ڈزنی چینل‘ اور ’ٹون ڈزنی‘ چینل انگریزی کے علاوہ تین علاقائی زبانوں میں نشر کرے گی۔ ڈزنی کی بھارت میں جگہ بنانے کی پہلی کوشش ہے۔ ایک اندازے کے مطابق بھارت میں دس سال سے کم عمر بچوں کی تعداد دس کروڑ ہے۔ یہ دونوں چینل شمالی بھارت میں ہندی اور انگریزی میں جب کہ جنوب میں تیلگو اور تامل میں دستیاب ہوں گے۔

والٹ ڈزنی نے ان چینلز کی نشیریات کے لیے بھارت کے سٹار ٹی وی نیٹ ورک سے معاہدہ کیا ہے۔

والٹ ڈزنی ٹی وی انٹرنیشنل (انڈیا) کے مینیجنگ ڈائریکٹر رجت جین کا کہنا ہے کہ مقامی آبادی کی ضروریات اور مزاج پر بہت توجہ دی جارہی ہے۔ انہوں نے بتایا کہ بھارت میں بچے اپنے پروگرام صرف دس فی صد دیکھتے ہیں اور اس کی وجہ یہ ہے کہ انہیں اچھے پروگرام میسر نہیں ہوتے۔

سن دو ہزار ایک تک بھارت میں بچوں کے لیے صرف ایک چینل ٹرنر انٹرنیشنل کارٹون نیٹ ورک تھا۔ لیکن صرف اس سال کے دوران تین چینلز کا آغاز کیا گیا ہے جن میں یو ٹی وی کا ہنگامہ، سونی کا اینی میکس اور ٹرنر کا پی او جی او شامل ہیں۔