لوگ کہتے ہیں کہ جن گھروں کے دروازے ہوں ان پر آفتیں آتی ہیں

اور انہیں کون نقصان پہنچائے گا کہ روایت کے مطابق بابا نے انہیں کہا تھا کہ اپنے گھروں کے دروازے نہ رکھیں کہ دروازوں سے گھر والوں پر آفتیں ٹوٹتی ہیں۔

اتر پردیش کی ریاست کے شہر ایودھیا کے نزدیک اس گاؤں میں پچھہتر گھر ہیں لیکن کسی بھی گھر کا دروازہ نہیں ہے۔

گاؤں کے ایک شخص لال منی تیواری نے جن کی عمر اسی برس کے قریب ہے، بتایا کہ جب بھی کسی نے دروازہ بنا کر گھر میں لگایا وہ کسی نہ کسی آفت کا شکار ہوگیا۔ ’بار بار اس طرح کے واقعات کے بعد ہمیں احساس ہوا کہ شیؤ بابا کو دروازے پسند نہیں ہیں۔

گاؤں کی چوپال میں مندر کے پروہت ترلوکی ناتھ گوسوامی نے شیؤ بابا کے بارے میں بتایا کہ سینکڑوں سال پہلے وہ یہاں رہتے تھے اور انہوں نے بڑی کٹھن تپسیا کی تھی۔ بابا کئی کئی دن تپسیا کی سختیاں جھیلا کرتے۔

’اسی استغراق میں ان کی وفات ہوئی اور برگد کا یہ پیڑ بالکل ٹھیک اس جگہ اُگ آیا جہاں ان کے پران نکلے تھے۔ ہم سوچتے ہیں کے ان کی آتما اس پیڑ کے اندر اب بھی موجود ہے۔‘

کہانی مشہور ہے کہ شیؤ بابا نے حکم دیا تھا کہ گاؤں میں کوئی گھر ایسا نہ بنے جس کی کچھ اینٹیں پہلے ان کے مندر کو دان نہ کی جائیں اور کسی گھر میں کواڑ نہ لگائے جائیں۔

گاؤں کے ایک اور شخص کرشن آچاریہ ترپاٹھی نے بتایا کہ ’میں نے گھر بنوانا شروع کیا تو بار بار دیواریں گر جاتیں۔ جب کئی بار ایسا ہو چکا تو کچھ لوگوں نے مشورہ دیا کہ گھر کی تھوڑی سی اینٹیں لے جاکے برگد کو دان کردو۔میں نے یہی کیا اور پھر مکان بن گیا۔ لیکن میں نے خود ہی گھر میں دروازے نہیں لگواۓ کیونکہ بابا کا یہی حکم تھا۔‘

لال منی تیواری نے کہا کہ بڑے بزرگ ہمیشہ مہربان بزرگ ہوتے ہیں۔ ’گاؤں میں کسی سے بھی پوچھ لیجیۓ یہاں کبھی چوری چکاری نہیں ہوئی ہے۔ ہم سب با با کی حفاظت میں ہیں۔‘

اتر پردیش جیسی ریاست میں جو جرائم سے بھری پڑی ہے آخر یہ جگہ کیوں محفوظ ہے اس کا اور کیا جواب ہو سکتا ہے۔

اکبر پور پولیس تھانے کے انسپکٹر گورکھ ناتھ سنگھ نے انیس سو چھ تک کا ریکارڈ چیک کرکے کہا ’یہ کتابیں دیکھ لیجۓ آج تک سیما کاری رات میں ایک بھی چوری کی واردات ریکارڈ نہیں ہوئی ہے۔‘