 |  کرشنا نے دوست کے مویشی مارنے پر ایک شخص کو قتل کردیا تھا |
بھارت کی ریاست تامل ناڈو میں ایک شاعر نے جسے پھانسی کی سزا سنائی گئی ہے، سیاست دانوں سے اپیل کی ہے کہ وہ اس کی سزا پر عمل درآمد رکوائیں۔ چھتیس سالہ رادھا کرشنا کو انیس سو چورانوے میں عدالت میں ایک شخص کو قتل کرنے پر موت کی سزا سنائی گئی تھی۔ مرنے والے نے کرشنا کے دوست کے مویشی مار دیئے تھے۔ سیاست دانوں اور شاعروں نے ’قاتل‘شاعر کی کتاب کی جس کا نام ہے ’جیل سے موتی‘ ہے بہت تعریف کی ہے۔ کرشنا نے تامل ناڈو ریاست سے بھی رحم کی اپیل کی تھی جو مسترد ہوگئی۔ اب کرشنا صدر اے پی جے کلام سے رحم کی اپیل کر رہے ہیں جو خود ایک شاعر ہیں۔ پچپن روپے کی کتاب ’جیل سے موتی‘ سے حاصل ہونے والی آمدنی بے آسرا بچوں کو ملتی ہے۔ اپنی کتاب میں شاعر نے نظموں میں سیاست کو بھی موضوع بنایا ہےاور عراق کی جنگ پر بھی اپنے خیالات نظم کیے ہیں اور سری لنکا کے تامل باغیوں کے رہنما پربھاکرن کا بھی تذکرہ کیا ہے۔ علاقے میں بھارتیہ جنتا پارٹی کے سربراہ حیران ہے کہ جذبات کا ایسا اظہار اس شخص نے کیا ہے جو جیل میں پھانسی کے انتظار میں ہے۔ سزائے موت پانے والے اس شاعر کے پاس ایم اے کی ڈگری ہے اور وہ آج کل کمپیوٹر کی تعلیم بھی حاصل کر رہا ہے۔ عام طور پر بھارت میں موتے کی سزا ختم کر دی جاتی ہے لیکن حال ہی میں بھارت کے صدر نے رحم کی ایک اپیل مسترد کر دی تھی اور مجرم کو چودہ اگست کو پھانسی دے دی گئی تھی۔ | 
یہ صفحہ دوست کو ای میل کیجیئے
پرِنٹ کریں
