منموہن سنگھ نے کسانوں کی امداد کا اعلان کیا ہے

منموہن سنگھ آج کل آندھرا پردیش کے دورے پر ہیں۔ آندھرا پردیش میں لگ بھگ تین ہزار کسانوں نے بھاری قرضے کی وجہ سے خود کشی کی ہے۔

وزیر اعظم کا عہدہ سمبھالنے کے بعد یہ منموہن سگھ کا پہلا سرکاری دورا ہے۔

اگلے ہفتے مرکزی کانگریس حکومت اپنا پہلا بجٹ پیش کرے گی۔ تجزیہ نگاروں کا خیال ہے کہ یہ بجٹ کسان دوست ہوگا۔

نامہ نگاروں کا کہنا ہے کہ اس دورے کا مقصد کسانوں کے لیے نئی حکومت کی ہم دردی کو نمایاں کرنا ہے۔

وزیراعظم نے خود کشی کرنے والے ہر کسان کے خاندان کو مرکزی سرکار کی طرف سے پچاس ہزار روپے (1136£) دینے کا اعلان کیا ہے۔

اس کے علاوہ ریاستی سرکار نے ہر خاندان کو ڈیڑھ لاکھ روپے (3400£) دینے کا اعلان کیا ہے۔

گاؤں والوں سے بات چیت کے دوران منموہن سنگھ نے کہا کہ وہ سبھی خاندانوں کو بینکوں کی طرف سے امداد دلانے کی پوری کوشش کریں گے اور ہر خاندان سے ایک فرد کو نوکری بھی دلوائیں گے۔

وزیر اعظم علاقے کے ایک گاؤں کے باشندوں سے بات کر رہے تھے۔ اس گاؤں میں پچھلے چھ سالوں میں تقریباً 53 کسان خود کشی کر چکے ہیں۔

منموہن سنگھ نے کہا کہ ’ میں بھی ایک کسان کا بیٹا ہوں، اس لیے مجھے کسانوں کی تکلیفوں اور پریشانیوں کا اندازہ ہے، مگر آج جو میں نے یہاں دیکھا ہے اس نے میری آنکھیں کھول دی ہیں۔‘

منموہن سنگھ نے گاؤں کے لیے ایک خاص امدادی پیکیج کا بھی اعلان کیا۔

آندھرا پردیش اور ہمسایہ ریاست کرناٹک میں کسان سود خور ساہوکاروں سے لیےبھاری قرضے نہ چکا پانے کی وجہ سے خود کشی کر رہے ہیں۔

کسانوں کے ایک گروپ کے سربراہ پی چنگلا ریڈی کا کہنا ہے کہ یہ مسئلہ کئی سالوں کی کسان مخالف پالیسیوں کا نتیجہ ہے۔