بھارت کے عام انتخابات میں کانگریس کی کامیابی پر ایک طرف تو امریکہ کو حیرانی ہوئی ہے تو دوسری طرف امریکی مبصرین کا کہنا ہے کہ کانگریس کی جیت دنیا بھر کی جمہوریتوں کے لئے ایک سبق ہے کہ وہ ووٹروں کو غیر سنجیدگی سے نہ لیں۔ ایک سینئر امریکی افسر نے بی بی سی کو بتایا ہے کہ ان کے خیال میں یہ نتائج حیرت انگیز تھے کیونکہ کسی نے بھی کانگریس کی اس حد تک کامیابی کی پیشن گوئی نہیں کی تھی۔ امریکی افسران اور ماہرین کانگریس کے انتخابی منشور کو غور سے پڑھنے میں مصروف ہیں تاکہ یہ جان سکیں کہ کیا اس کی خارجہ پالیسی میں کوئی بڑی تبدیلی ہوگی یا نہیں۔ ابتدائی ردِ عمل کے بعد اب دونوں فریق ایک دوسرے کو یقین دہانی کرارہے ہیں اور اطلاعات کے مطابق کانگریس کے رہنماؤں نے اپنے نجی ذرائع سے امریکہ کو یہ پیغام بھیجا کہ ان کی پالیسی میں کوئی واضح تبدیلی نہیں آئے گی۔ امریکی وزارتِ خارجہ نے اس بات پر زور دیا کہ دنیا کی سب سے بڑی جمہوریت اور دنیا کے سب سے زیادہ طاقتور ملک کے درمیان تعلقات اپنے آپ میں بہت اہم ہیں اور بھارت میں حکومت کی تبدیلی سے زیادہ فرق نہیں پڑے گا۔ امریکی حکومت کے ترجمان رچرڈ باؤچر نے انتخابی نتائج کا خیر مقدم کرتے ہوئے کہا کہ ماضی میں بھی واشنگٹن نے کانگریس کو اہم حزبِ اختلاف سمجھتے ہوئے اس کہ ساتھ تعلقات قائم رکھے ہیں اور جب کبھی بھی کوئی امریکی افسر بھارت کے دورے پر گئے تو انہوں نے کانگریس رہنما سونیا گاندھی سے بھی ملاقات کی۔ امریکی افسر نے بتایا کہ نئے وزیرِ اعظم کی حلف برداری اور نئی کابینہ کی تشکیل کے بعد بش انتظامیہ کے سینئر افسر اپنے نئے ہم منصبوں کو مبارک باد دیں گے اور دونوں ملکوں کے تعلقات کی اہمیت پر زور دیں گے۔ تاہم امریکہ میں کانگریس کے ترجمان ابھیشیک سنگھوی کے واشنگٹن پوسٹ میں چھپنے والے اس بیان پر تشویش محسوس کی گئی تھی جس میں انہوں نے کہا تھا کہ غیر وابستہ ممالک جیسی تنظیم کا نظریہ ایک ایسے دور میں زیادہ اہمیت اختیار کر لیتا ہے جب دنیا میں ایک ہی سپر پاور ہو۔ | 
یہ صفحہ دوست کو ای میل کیجیئے
پرِنٹ کریں
