’سونیا سے ذاتی تعلقات اچھے ہیں مگر استعفے کا معاملہ الگ ہے‘

راجیہ سبھا کی رکن سشما سوراج کا کہنا تھا کہ سونیا غیر ملکی ہیں اور بھارت کے وزیر اعظم تو کیا کسی بھی بڑے عہدے کے لیے کوئی غیر ملکی ہمارے لیے قابل قبول نہیں ہے۔

بی بی سی ہندی سروس کو ایک سوال کے جواب میں انہوں نے کہا کہ سونیا سے ان کے ذاتی تعلقات اچھے ہیں اور استعفے کا معاملہ الگ ہے۔

انہوں نے کہا کہ حزب مخالف کی وہ جماعتیں جو سونیا کی حمایت کررہی ہیں وہ کانگریس مخالف مینڈیٹ لے کر آئی تھیں اور اب وہ سونیا گاندھی کی حمایت کررہی ہیں۔ انہوں نے مزید کہا کہ اس طرح سے وہ عوام کو دھوکا دے رہی ہیں۔

سشما سوراج کا کہنا تھا کہ کانگریس کبھی بھی سونیا گاندھی کو وزیر اعظم بنانے کا ارادہ نہیں رکھتی تھی۔

انہوں نے کہا کہ سونیا گاندھی کے ملک کی وزیر اعظم کا حلف اٹھانے سے قبل ہی وہ اور ان کے شوہر سوراج کوشل جو خود بھی راجیہ سبھا کے رکن ہیں، اپنے اپنے عہدوں سے مستعفی ہوجائیں گے۔

ایک اور سوال کے جواب میں انہوں نے کہا کہ یہ راجیہ سبھا کا فیصلہ نہیں بلکہ ان کا ذاتی فیصلہ ہے۔ جب ان سے اس فیصلے پر راجیہ سبھا کے رد عمل کے بارے میں پوچھا گیا تو انہوں نے کہا کہ پارٹی ان کا فیصلہ سن کر خاموش رہی۔